افغانستاننینگ بیرلشگن ملتلر تشکیلاتیدهگی نمایندهلیگی سرپرستی نصیر احمد فایق، طالبلرنینگ تشقی ایشلر وزیری امیرخان متقی نینگ بیرلشگن ملتلر تشکیلاتیدهگی افغانستان چوکیسی طالبان نمایندهسیگه تاپشیریش طلبی یوزهسیدن مناسبت بیلدیردی و کېسکین سوال قۉیدی: «طالبان قَیسی ایجابي ایش و قَیسی قانونيلیک میزانی اساسیده بیرلشگن ملتلر تشکیلاتدهگی افغانستان چوکیسینی طلب قیلماقده؟»
فایق بوگون (چهارشنبه، ۳۰-ثور) ایکس اجتماعي ترماغیده یازیشیچه، بیرلشگن ملتلر تشکیلاتیدهگی نمایندهلیک فقط حاکمیتنی خلق ارادهسی اساسیده، قانوني یۉل بیلن قۉلگه کیریتگن، فقرالر حقوقلرینی جنسی، ملتی و مذهبی کمسیتیشسیز تأمینلهیدیگن همده ملي و خلقارا مجبوريتلرگه رعایه قیلهدیگن حکومتلرگه تېگیشلی بۉلیشی کېرهک.
اونینگ قۉشیمچه قیلیشیچه، «طالبان رژیمی بېش ییل دوامیده نه افغانستان خلقی نینگ قانوني طلبلریگه جواب بېردی و نه خلقارا همجعیت نینگ انیق طلبلرینی بجردی.»
فایقنینگ یازیشیچه، حاضر هم مکتب و بیلیم یورتلری قیزلر اوچون یاپیق، عیاللر ایش و جمعیت حیاتیده اشتراک اېتیش حقوقیدن محروم، اینکلیوزی و ملي تیزیم یۉق، فساد کېنگهیگن، خوفسیزلیک یامانلشگن همده ترورچی گروهلر بیلن باغلیق خوفلر آرتگن.
اونینگ ینه تأکیدلهشیچه کمبغللیک، مجبوري نکاحلر، سابق حربيلرنینگ نشانگه آلینیشی، سۉز اېرکینلیگینینگ چېکلنیشی و اېکسترېمیزم نینگ کېنگ ترقهلیشی جدّي معمالردیر.
طالبلر تشقی ایشلر وزیری امیرخان متقی اوّلراق بیرلشگن ملتلر تشکیلاتینینگ افغانستاندهگی نمایندهلیگی اۉرین باسری بیلن اوچرهشووده ینه بیر بار طالبان نمایندهسیگه بیرلشگن ملتلر تشکیلاتیدهگی لوازمنی بېریشنی سۉرهگن اېدی.
بیراق بیرلشگن ملتلر تشکیلاتی طالبان ایچکی و خلق ارا مقیاسده تن آلینمهگنی سببلی بو طلبنی رد اېتیب کېلماقده.
حاضرده بیرلشگن ملتلر تشکیلاتیدهگی افغانستان نمایندهلیگی لوازمینی نصیر احمد فایق بجریب کېلماقده.
