ایران جمهور رییسی مسعود پزشکیان، بو مملکت دنیاگه اۉزینینگ هسته قورالی آرتیدن قوومهیاتگنیگه ایشانچ بېریشگه تیار اېکنینی ایتدی.
ایرنا خبرگزارلیگینینگ گزارشیگه کۉره، پزشکیان بو فکرنی یکشنبه کونی (۳ جوزا) دولت تلویزیونی مسوللری بیلن صحبتده بیلدیرگن.
ایران جمهور رییسی شوندهی دېگن: «امام شهیدیمیز دوریده اعلان قیلگن اېدیک، حاضر هم اعلان قیلهمیزکی، بیز دنیاگه هسته قورالی آرتیدن قوومهیاتگنیمیزگه ایشانچ بېریشگه تیارمیز. بیز منطقهده بېقرارلیک ایستهمهیمیز.»
اونینگ ینه قۉشیمچه قیلیشیچه: «منطقهنی بېقرارلشتیریشگه اورینهیاتگن تامان؛ بو اسراییل رژیمی دیر. او بویوک اسرایل لایحهسینی عملگه آشیریشنی کۉزلهماقده.»
امریکا قۉشمه ایالتلری، اسراییل و اَیریم غرب دولتلری ایراننی هسته قورالیگه اېگه بۉلیشگه اورینهیاتگنلیکده عیبلب کېلهدی.
اۉتگن ییلگی۱۲ کونلیک اوروش همده بو ییل امریکا و اسرایلنینگ ایرانگه اویوشتیرگن قۉشمه هجوملری هم عیناً شو دعوالر بیلن آقلنگن اېدی.
دونالد ترامپ بیر نېچه بار ایراننی هسته قورالی یرهتیشدن تۉختهتیش اوچون هجوم قیلگنینی ایتگن.
ایران سابق رهبری علی خامنهای اېسه ایلک بار۱۳۸۹ قویاش ییلی نینگ۲۱ قوس کونی « خلق ارا هستهای قوراللسیزلتنیریش کنفرانسی» یوبارگن یازمه مراجعتیده هسته قوراللرینی «ایشلب چیقریش، سقلش و قۉللش»نی «حرام» دېب اعلان قیلگن اېدی.
او کېینچهلیک ۱۴۰۲-ییلده هم شو مضموندهگی فرماننی قَیته چیقردی. بو قرار غرب، اینیقسه امریکا بیلن حربي تۉقنهشوونینگ آلدینی آلیش مقصدیده قبول قیلینگنی ایتیلهدی.
