ایران تشقی ایشلر وزیرلیگی سۉزلاوچیسی اسماعیل بقایی، امریکا بیلن مذاکرهلرده اَیریم مسألهلرده عمومي خلاصهلرگه اېریشیلگنینی، اما کېلیشوو جوده یقین دېب بۉلمسلیگینی ایتدی.
او بوگون (دوشنبه، 4 جوزا) ژورنالیستلرگه شوندهی دېدی: «بعضی مسألهلرده یکوني خلاصهگه کېلگنمیز، اما کېلیشوو یقین دېب ایته آلمهیمیز.»
امریکا قۉشمه ایالتلری تشقی ایشلر وزیری مارکو روبیو کېچه امریکا یقین ساعتلرده مذاکرهلر بۉییچه یخشی ینگیلیکلر اعلان قیلینیشینی بیلدیرگن اېدی. بیراق بیر نېچه ساعتدن کېین دونالد ترامپ مذاکرهلرده شاشیلمهیاتگنینی، او «تۉغری کېلیشوو» ایزلهیاتگنینی ایتدی.
ایران تشقی ایشلر وزیرلیگی سۉزلاوچسیگه کۉره، امریکا رسميلرینینگ قرهمه-قرشی بیاناتلری و مذاکرهلر پیتیده یوز بېرگن حربي حرکتلر جریاننی چۉزماقده.
اونینگ ایتیشیچه: «امریکا رسميلرینینگ ضد موضعلری و مذاکرهلر دوامیده عملگه آشیریلگن هجوملر بو جریاننی چۉزماقده، چونکه امریکا سیاستی غربي آسیاده ترتیبسیزلشگن و قرهمه-قرشی بیاناتلر بیر نېچه ساعت ایچیده پیدا بۉلماقده.»
امریکا تامانی مذاکرهلرده هسته مسألهسینی اساسي موضوع صفتیده کۉرهیاتگن بۉلسه، ایران تشقی ایشلر وزیرلیگی سۉزلاوچیسی حاضرده اوروشنی توگهتیشگه قرهتیلگنینی ایتهدی و بو باسقیچده هسته باییتیش مسألهسی محاکمه قیلینمهیاتگنینی بیلدیرگن.
اونینگ سۉزلریگه کۉره، احتمالي کېلیشوودهگی اۉت آچیشنی تۉختهتیش رېجهسی «برچه جبهلرده اوروشنی توگهتیش»نی اۉز ایچیگه آلهدی.
آلدین اپریل آیینینگ باشیده ایران، امریکا و اسرایل اۉرتهسیده اۉت آچیشنی تۉختهتیش کېلیشوویگه اېریشیلگن اېدی، بیراق اسرایل لبانگه هجوملرینی دوام اېتتیرگنینی بیلدیرگن.
ایران اېسه اسرایلنی صلحنی بوزیشده عیبلب، فقط برچه فرونت (جبهه)لرده اوروش تۉلیق توگهتیلگندهگینه کېلیشووگه تیار بۉلیشینی تأکیدلب کېلماقده.
