طالبلر مدافعه وزیری محمد یعقوب مجاهد، روسيهدن قَیتگچ کابل قۉنالغهسیده پاکستان سۉنگّی آیلرده افغانستاننینگ ایستهلگن حدودینی بامباردمان قیله آلگنینی، بیراق طالبان بوندن بویان پاکستان نینگ بوندهی ایشنی قیلیشگه «جرعتی یېتمسلیگی» اوچون حرکت قیلهیاتگنینی ایتدی.
طالبلر مدافعه وزیری امنیتی کنفراسیده اشتراک اېتیش مقصدیده مسکوگه بارگن اېدی. اونینگ اوشبو سفری دوامیده طالبان و روسيه اۉرتهسیده حربي همکارلیک تۉغریسیدهگی بیتیم امضالندی. خبرلرگه کۉره، اوشبو کېلیشوو اساسیده روسيه طالبانگه مدافعه اوسکونهلرینی تقدیم اېتهدی.
بیراق یعقوب مجاهد بوگون (شنبه، ۹جوزا) کابل قۉنالغهسیده ژورنالیستلرگه بېرگن صحبتیده بیتیم نینگ مقصدی «حربي-تخنیکي همکارلیک» اېکنینی، بو «مدافعه یاکه خوفسیزلیک بۉییچه کیمنی دیر تشویشگه سالهدیگن کېلیشوو اېمسلیگینی» تأکیدلهدی.
اونینگ ایتیشیچه، افغانستان حربي تیزیمیده کۉپلب روس تخنیکلری، جملهدن اوچاقلر قۉللنیلهدی و طالبان اولرنی ترمیملش همده مودرنیزه قیلیش اوچون ایشلب چیقرووچی دولت بیلن کېلیشوو توزیشگه مجبور.
مدافعه وزیری امضالنگن حجت حربي-تخنیکي همکارلیک قندهی عملگه آشیریلیشینی بېلگیلاوچی عمومي دایره اېکنینی و افغانستان مدافعه تیزیمیگه احتیاج سېزهیاتگنی سببلی «قندهی مدافعه تیزیمیگه اېگه بۉلیش و اونی قَیسی مملکتدن آلیب کېلیش» مسألهلری محاکمه قیلینیشینی ایتدی.
طالبان نینگ روسيه بیلن توزگن سۉنگگی کېلیشووی اوشبو گروه نینگ خارجي دولت بیلن امضالهگن ایلک حربي بیتیمی حسابلنهدی.
یعقوب مجاهد طالبان امریکا و برازیلده ایشلب چیقرگن اوچاقلردن هم فایدهلنهیاتگنینی، ضرورت توغیلسه بو دولتلر بیلن هم کېلیشوولر توزیلیشینی بیلدیردی.
او طالبان نینگ حربي رواجلنیشی منطقهدهگی خوفسیزلیک همکارلیگی اوچون امید منبعی بۉلیشی کېرهکلیگینی تأکیدلهدی.
مدافعه وزیری دولتلر اۉرتهسیده رقابت موجودلیگینی، بیراق طالبان افغانستان نینگ «ملي منفعتلری»نی کۉزلب ایش یوریتیشینی و هېچ بیر مملکت فایدهسی یاکه ضرریگه حرکت قیلمسلیگینی قۉشیمچه قیلدی.
طالبان افغانستانده حاکمیتنی اېگهلهگنیگه قریب بېش ییل بۉلگن بۉلسه-ده، حاضرچه اونی فقط روسيه رسماً تن آلگن. بیراق منطقهدهگی باشقه دولتلر هم اوشبو گروه بیلن همکارلیک قیلماقده.
شو بیلن بیرگه، اوّللری طالبان نینگ اساسي طرفدارلریدن بیری صفتیده تنیلگن پاکستان بیلن مناسبتلر کېسکینلشگن. اۉتگن ییل آخریده ایکّی تامان اۉرتهسیده قوراللی تۉقنهشوولر هم یوز بېرگن اېدی.
پاکستان طالباننی، جملهدن، تحریک-طالبان پاکستان اعضالریگه باشپناه بېریشده و اولرنینگ افغانستان توپراغیدن پاکستانگه قرشی فایدهلنیشیگه یۉل قۉییشده عیبلهیدی. طالبان ادارهسی اېسه بو ادعالرنی رد اېتیب کېلماقده.
