پاکستان مدافعه وزیری خواجه محمد آصفنینگ ایتیشیچه، افغانستان طالبانینینگ پاکستان طالبانی حرکتی (تیتیپی)گه نسبتاً سیاستی قرهمه-قرشی بۉلیب، اولر بو گروهنی قۉللب-قوّتلشنی «بیر مرته و بوتونلهی» تۉختهتیشی کېرهک.
پاکستان جیونیوز یېتکرمهسینینگ خبر بېریشیچه، خواجه آصف دوشنبه کونی ۱۱-جوزا طالبان نینگ تیتیپینی قۉللب-قوّتلشده دوام اېتهیاتگنیدن آگاهلنتیرگن.
یقینده اکسپرس تریبونې گزېتهسی افغانستان طالبانینینگ رهبری هبتالله آخوندزاده تیتیپیدن پاکستان دولتیگه قرشی هجوملرنی تۉختهتیشنی سۉرهگنی حقیده خبر بېرگن اېدی.
بیراق پاکستان مدافعه وزیری شوندهی دېدی: «بو مسأله فقط عامهوي اخبارات واسطهلریده تیلگه آلینماقده، اما عملده میداندهگی وضعیتده هېچ قندهی اۉزگریش یوز بېرمهگن.»
خواجه آصفنینگ تأکیدلشیچه، افغانستان طالبانی تیتیپی مسألهسیده قرهمه-قرشی موضعلرنی توتماقده و اولرگه ایشانیب بۉلمهیدی.
او شوندهی قۉشیمچه قیلدی: «افغانستاننینگ مؤقت حکمدارلری (طالبان) تامانیدن تروریزم مسألهسی بۉییچه یوباریلهیاتگن قرهمه-قرشی سیگناللرگه ایشانیش جوده خوفلی بۉلهدی. عملده هېچ قندهی نتیجه یۉق.»
پاکستان و طالبان اۉتگن ییلی دیورند چیزیغی بۉیلب ایکّی تامان چېگره کوچلری اۉرتهسیده یوز بېرگن آتیشمهلر سببلی تۉقنهش کېلگن اېدی.
اوشبو تۉقنهشوو نتیجهسیده پاکستان «غضب-الحق» عملیاتینی باشلهدی. عملیات دوامیده کابل، قندههار، ننگرهار، خوست، کنر، هلمند، پکتيا و پکتیکا ولایتلریدهگی بیر قطار حدودلر بامباردمان قیلیندی.
طالبان بونگه جوابن دیورند چیزیغی بۉیلب پاکستان چېگره پوستهلریگه هجوم قیلدی و پاکستان بیلن سودانی تعقیقلهدی. بو تعقیق هنوزگچه دوام اېتماقده.
