هراتدن کېین طالبان کابلده هم اوشبو گروهنینگ «امر به معروف و نهي از منکر» خادملری عیاللرنینگ کيینیشیگه قطعي نظارت اۉرنهتیشینی و «حجاب طلبلریگه رعایه قیلمهگن» عیاللرنی حبسگه آلیشینی معلوم قیلگن.
کابلنینگ غربي قِسمیدهگی محله وکیللریدن بیری اینترنتدهگی گروهده ترقهتیلگن آوازلی پیامده کېلهسی هفتهدن باشلب طالباننینگ نظارتچیلری فعالیتی باشلنیشینی ایتگن.
اونینگ سۉزلریگه کۉره، کابل نینگ ۱۳-ناحیهسیده عیاللر حجابی مسألهسی بۉییچه ییغیلیش اۉتکزیلگن و طالبان محله وکیللری همده مسجد اماملریگه اوشبو نظارت تدبیرلری نینگ باشلنیشی حقیده اهالیگه خبر بېریشنی بویورگن.
شونینگدېک، اونینگ ایتیشیچه، عیاللر حجابی حقیدهگی آگاهلنتیریشلر نانوایخانهلر و مسجدلر کیریش جایلریگه هم آسیب قۉییلگن.
بوندن اوّل طالبان هراتده هم عیاللرنی گروه تامانیدن قبول قیلینگن کيینیش قاعدهلریگه رعایه اېتمسلیک عاقبتلری حقیده آگاهلنتیرگن و «ناتۉغری حجاب»ده یورگن عیاللر تۉغریدن-تۉغری قماققه یوباریلیشینی بیلدیرگن اېدی.
طالبان اوشبو هفتهنینگ باشیدن باشلب هراتده عیاللرنی حبسگه آلیش عملیاتینی باشلهگن.
بوگون هرات نینگ جبرییل منطقهسیده اهالیسی عیاللرنینگ اۉزباشیمچهلیک بیلن حبسگه آلینهیاتگنیگه قرشی نمایش اۉتکزدی. طالبان اوشبو ناراضیلیک نمایشینی کوچ ایشلهتیب ترقهتگن.
