افغانستان بیزنینگ آته-بابالریمیزدن قالگن یورت. بیز شو یورتده دنیاگه کېلدیک، اۉسدیک و حیاتیمیزنی شو یېرده داوام اېتتیرماقدهمیز.
بالهلیگیمیزدن باشلب بیزگه وطنگه محبت، تینچلیکنی سقلش و مملکت ترقیاتی اوچون خدمت قیلش اۉرگهتیلدی.
حاکمیتگه بۉلگنلردن هر دایم: وطن برچهمیزنینگدیر و بیزلر بیر-بیرو بیلن ایناغهمیز دېگن شعارلرنی اېشیتیب کېلدیک.
مېن هم شو روحیه بیلن تربیه تاپگنمن. آتهم هر دایم: بالهم، اۉزبېک، پشتون، تاجک دېمهگین؛ یورتینگنینگ کېلهجگینی اۉیله، ـ دېردیلر.
بوگون اۉشه نصیحتلر یخشی اېسیمده. لېکن حاضرگی شرایطگه قرهگنده، بو آرزو عملده اۉز عکسینی تاپمهگنینی کۉریش ممکن. بو گپلر ناتۉغری اېدی دېماقچی اېمسمن، بلکه عمل بیلن شعار آرهسیده کتّه فرق بارلیگینی ایتماقچیمن.
جمهوریت دوریده هم برچه خلقلرتېنگ، برچه بیر مملکتنینگ فرزندی، دېگن شعارلر کۉپ تکرارلندی. اما عملده دولتی قدرت و سیاسی تصمیملرده برچه قوملر بیر خیل اۉرین اېگهلهگنی حقیده سواللر همیشه موجود بۉلدی.
طالبان حاکمیتگه کېلگندن بویان، یعنی سۉنگگی بېش ییلگه ییقین مدت ایچیده، باشقه قوملرگه، خصوصاً اۉزبېکلرگه قرشی باسیملر کۉپهیگنی حقیده کۉپلب ادعالر و معلوماتلر مطرح بۉلماقده.
بو مدت داوامیده کۉپلب اۉزبېک فرهنگی، اجتماعی و رسانهای سیمالری قۉلگه آلینیب، سورگون اېتیلگنی، تهدید قیلینگنی و قماقلرده سقلنگنی حقیده خبرلر ترقتیلدی و اۉزبېکچه یازوولر اوچیریلیشیگه هم گواه بولدیک شونینگدېک، اۉزبېک تیلی و فرهنگی فعالیتلرگه هم کۉپراق چېکلاولر قۉییلگنی بیلدیریلماقده. بو وضعیت اۉزبېک جامعهسی آرهسیده تېنگ حقوق، مدنی اېرکینلیک و فرهنگی هویتنینگ حقیده تشویشلرنی ینه-ده آشیرگن.
بو مقالهنینگ عنوانی (ملی شعار، قومی منفعت) هم شو حقیقتنی انگلتهدی. مېنینگ قرهشیمچه، کۉپینچه ملی منفعت نامی آستیده قیلینگن سیاساتلردن بعضی قوملر کۉپراق منفعت کۉردی، باشقه قوملر اېسه اۉزلرینی چیتده قالگندیک حس اېتدی.
بو احساسنی کۉچیتیرگن مسئلهلردن ینه بیری، مملکتنینگ بعضی ملی رمزلریدیر. افغانستان نامی، رسمی پولنینگ (افغانی) اتهلیشی و دولتی بیراق، نشان و باشقه رسمی سمبوللرده پشتو تیلی و افغان یا اوغان هویتینینگ کۉپراق نمایان بۉلیشی، کۉپلب اۉزبېکلر، تورکمنلر، تاجکلر، هزارهلر و باشقه قوملر آرهسیده ملی رمزلر برچه خلقلرنی بیر خیل نمایندگی قیلهپتیمی؟ دېگن سواللر پیدا قیلهدی. اولرنینگ قرهشیمچه، اگر افغانستان حقیقتن هم برچه قوملرنینگ اۉرتاق وطنی بۉلسه، ملی رمزلرده، دولتی تیل سیاساتیده و حکومتی ادارهلرده هم برچه قوملر اۉزلرینی تېنگ درجهده کۉره آلیشی کېرهک.
افغانستانده یشاوچی اۉزبېکلر، تورکمنلر، تاجکلر، هزارهلر و باشقه قوملر هم بو مملکتنینگ تېنگ حقلی فرزندلریدیر. شو سببلی دولتی اداره، سیاسی قدرت، بیلیم، اقتصاد و فرهنگده هم برچهگه بیر خیل امکانیت یرهتیلیشی عادلانه یۉل بۉلهدی.
بوگون هم کۉپلب یاشلر اۉز آنه تیللری، فرهنگی حقوقلری و فرصتلری حقیده سواللر بېرماقده.
اولرنینگ قرهشیچه، تېنگلیک فقط شعارده اېمس، بلکه عملده هم کۉرینیشی کېرهک.
افغانستان بیر قومنینگ اېمس، بلکه برچه قوملرنینگ اۉرتاق اولکهسیدیر. اگر عدالت، تېنگ حقوق و اۉزآرا حرمت عملده تأمین اېتیلمهسه، ملی بیرلیکنی فقط شعارلر بیلن سقلش قیین بۉلهدی.
شو سببلی، مستحکم افغانستاننی قوریش اوچون برچه خلقلر اۉزینی بو یورتنینگ تېنگ حقلی اېگهسی صفتیده حس قیلشی، دولتی ادارهلرده هم شو تېنگلیک عملی کۉرینیش تاپیشی مهمدیر.
فقط شو یۉل بیلن حقیقی ملی بیرلیک و برقرار تینچلیکگه اېریشیش ممکن.
