جهان ساغلیقنی سقلش تشکیلاتینینگ شرقي اۉرته یېر دېنگیزی منطقهسی بۉییچه مسوولی حنان بلخينینگ معلوم قیلیشیچه، جاري ییل باشیدن بویان افغانستانده انسانپرورلیک تشکیلاتلری قۉللب-قوّتلهگن۱۵۰ ته طبیات مرکزی مبلغ یېتیشمسلیگی سبب فعالیتینی تۉختهتگن یاکه وقتینچه تۉختهتیب قۉیگن.
عینی پیتده افغانستانده بۉلیب تورگن بلخي ایکس اجتماعي ترماغیده یازیشیچه، بو حالت طبیات خادملری نینگ بالهلرنی اېملش امکانیتینی کمهیتیرگن، آنهلر نینگ خوفسیز طبي خدمتلردن فایدهلنیشینی قیینلشتیرگن همده بېمارلر نینگ ضرور طبي یاردم آلیشیده جدّي معمالرنی یوزهگه کېلتیرگن.
او شوندهی دېدی: “بو یۉقاتیشلرنی اعتبارسیز قالدیریب بۉلمهیدی.”
جهان ساغلیقنی سقلش تشکیلاتی منطقوي مسوولینینگ تأکیدلشیچه، افغانستانده۲۲ میلیوندن آرتیق کیشی انسانپرورلیک یاردمیگه محتاج بۉلیب، شوندن۱۴.۴ میلیون نفری ساغلیقنی سقلش خدمتلریگه احتیاج سېزماقده.
بلخي نینگ ایتیشیچه، افغانستان اوچون ۲۰۲۶ییلگی ساغلیقنی سقلش بۉییچه فوق العاده جواب دستوری جدّي مالیوي تنقیصلیککه دوچ کېلگن و جاري ییل جون آییگچه ضرور مبلغ نینگ اتیگی۱۷فایزی تأمینلنگن.
او خلقارا همجميعتنی ساغلیقنی سقلش خدمتلری نینگ اوزلوکسیز کۉرسهتیلیشینی تأمینلش، اېریشیلگن یوتوقلرنی سقلب قالیش همده اېنگ کۉپ احتیاج سېزهیاتگن اهالیگه خدمت کۉرسهتیشنی دوام اېتتیریش اوچون مالیوي کمکنی سقلب قالیشگه چقیردی.
افغانستاندهگی انسانپرورلیک دستورلری امریکا جمهور رییسی دونالد ترامپ مأموریتی امریکا مالیوي یاردمینی تۉختهتگنیدن سۉنگ منتظم روشده مبلغ تنقیصلیگی و باشقه قیینچیلیکلرگه دوچ کېلماقده.
اۉتگن ییلی هم مبلغ یېتیشمسلیگی سبب افغانستان بۉیلب اۉنلب طبیات مرکزلری اۉز فعالیتینی تۉختهتگن اېدی.
