بیرلشگن ملتلر تشکیلاتینینگ افغانستاندهگی یاردم ادارهسی (یوناما) انسان حقوقلری بۉییچه ینگی گزارشیده معلوم قیلیشیچه، طالبلرنینگ «امر به معروف و نهی از منکر» خادملری هراتده کيینیش قاعدهلری سبب اَیریم عیاللرنی حبسگه آلگنیدن سۉنگ، حبسگه آلینیش قۉرقووی طفیلی شهر کۉچهلریده عیاللر سانی سېزیلرلی درجهده کمهیگن.
گزارشگه کۉره، ۸-۶جون کونلری طالبلرنینگ «امر به معروف» خادملری هراتده کمیده ۳۰عیال و قیزنی چادر کيمهگنلیک عیبلاوی بیلن حبسگه آلیب، قماققه اۉتکزگن. اوشبو عیاللر و قیزلر 8-جون کونی قَیته بوندهی حالتنی تکرارلهمسلیک حقیده مجبوريت آلگنلریدن سۉنگ آزاد اېتیلگن.
یوناما حساباتیده قید اېتیلیشیچه، طالبلر طلب قیلهیاتگن حجابنی جاري اېتیش کمپاینی هراتده اۉتگن ییلدن باشلنگن. گروه نظارت پوستهلر تشکیل اېتیب، چادر کيمهگن عیاللرنی اولرنینگ یقینلری چادر آلیب کېلگونیگه قدَر اوشلب تورگن.
گزارشده ایتیلیشیچه، اۉتگن ییلی طالبلرنینگ نظارت پوستهسی اساسن هرات نینگ جبریل ناملی شیعه اهالیسی یشهیدیگن حدودیده فعالیت یوریتگن.
یوناماگه کۉره، طالبلر اۉتگن ییل نینگ نوامبر آییده طبیات مؤسسهلری، تجارت مرکزلری اېگهلری و تۉیخانهلر مأموریتیگه آغزهکی کۉرسهتمه بېریب، بورقه کيمهگن عیاللرنینگ کیریشیگه یۉل قۉیمسلیکنی بویورگن.
گزارشده کېلتیریلیشیچه، اوشبو کۉرستمه کوچگه کیرگنیدن کېین چېگره بیلمس شفاکارلر هرات ولایت شفاخانهسیده بېمارلر قبول قیلینیشی۲۸ فایزگه کمهیگنینی قید اېتگن.
