ایران قۉللب-قوّتلهیاتگن یمندهگی حوثيلر سعودي عربستانینینگ بیر نېچه نفت تانکېریگه قیزیل دېنگیزدهگی «ینبع» بندری یقینیده هجوم قیلگنینی معلوم قیلدی.
فرانسه خبرگزارلیگی خبریگه کۉره، حوثيلر مطبوعات سۉزلاوچیسی یحیی سریع بوگون (چهارشنبه، 14 اسد) اعلان قیلگن ویدېوده سعودي نینگ «وفا» ناملی نفت تانکری قیزیل دېنگیزنینگ شمالي قِسمی و«ینبع» ساحللری یقینیده بیر نېچه بالیستیک راکت بیلن موفقیتلی نشانگه آلینگنینی ایتدی.
حوثيلرنینگ تأکیدلشیچه، اولر سعودي عربستانیگه قرشی دېنگیز قملینی اعلان قیلگنیدن سۉنگ، ریاض اۉز نفت تانکرلرینی قیزیل دېنگیزنینگ شمالي قِسمیگه یۉنهلتیرگن.
یحیی سریع نینگ ایتیشیچه، حوثيلر اېندیلیکده سعودي نفت تانکرلریگه قرشی هجوملرنی ینهده کوچهیتیرهدی. اولرنینگ مقصدی «برچه دېنگیز یۉللرینی تۉسیش و تانکرلرنینگ حرکتلنیشیگه یۉل قۉیمسلیک» اېکنینی بیلدیردی.
حوثيلر 22-جولای کونی سعودي عربستانگه قرشی دېنگیز قملینی اعلان قیلگنیدن بویان بو سعوديه نینگ سکّیزینچی نفت تانکری هجومگه اوچرهگنینی معلوم قیلدی.
اثران قۉللب-قوّتلهیاتگن اوشبو قوراللی گروه سعودي عربستان بیلن کېسکینلیک کوچهیگنیدن سۉنگ، «کۉزگه کۉز» تمایلی اساسیده ریاض گه قرشی دېنگیز قملینی جاري اېتگنینی بیلدیرگن.
فرانسه خبرگزارلیگی معلوماتیگه کۉره، اوشبو قمل دنیادهگی اېنگ ییریک نفت اېکسپورتچیلریدن بیری بۉلگن سعودي عربستان نینگ نفتینی جهان بازارلریگه یېتکزیب بېریش امکانیتیگه جدّي تهدید توغدیرگن. اینیقسه، ایران بیر وقت نینگ اۉزیده هرمز بۉغازینی یاپیب، سعودي نینگ ینه بیر مهم دېنگیز یۉلینی تۉسیب قۉیگنیدن سۉنگ وضعیت ینهده مرکّبلشگن.
هرمز بۉغازی یاپیلگچ، «ینبع» بندری سعودي نفت اېکسپورتی نینگ اساسي مرکزیگه ایلندی. باب ال-مندهب بۉغازی اېسه خام نفت تشیش نینگ حیاتي یۉلیگه ایلندی.
