خلقی‌میزنینگ تانیقلی یازوچیسی، تیل‌شناس و تدقیقاتچی دوکتور عزیزالله ارال‌نینگ ۴۰۰ بیتدن عبارت تیل، تاریخ، ادبیات و مدنیتگه عاید «تیل آنگی» ناملی قیمتلی کتابی کابلده چاپ‌دن چیقیب، تیل و کتاب شیدالری اختیاریگه قۉییلماقده.
بو کتابنی ۲۹نچی میزان – اوزبیک تیلی ملی کونی عرفه‌سیده مولف‌نینگ هدیه‌سی صفتیده قبول قیلینگ! کتاب کابل و ولایتده‌گی اوزبیک کتابخوانلریگه هدیه قیلینه‌دی.
اوشبو اثر علمي، علمي-تدقیقي و ژورنالیستي تجربه‌لرینی اۉز ایچیگه آلیب، اونده مۉلف‌نینگ اۉزبېک تیلی، ادبیاتی، ملي مدنیتی، تاریخي میراثی همده بوگونگی معنوي-معرفي جریانلرگه عاید قره‌شلری اوز عکسینی تاپگن.
کتاب‌نینگ اساسي قیمتی شونده‌کی، اونده علیشېر نوایی، امیر تېمور و ظهیرالدین محمد بابور کبی بویوک تاریخي شخصلر میراثی زمانه‌وي تفکر نقطهٔ نظریدن تلقین قیلینه‌دی. مۉلف اوشبو اولوغ سیمالرنینگ نه‌فقط تاریخي فعالیتی، بلکه اولرنینگ بوگونگی ملي اۉزلیکنی انگلش، معنوي ترقیات و مدني اویغانیش جریانلریده‌گی اۉرنینی هم چوقور تحلیل قیله‌دی.
شونینگ‌دیک، تیل آنگی کتابیدن ایریم اوزبیکستانلیک یازوچی و ادبیاتشناسلر مقاله‌لری هم اورین آلگن.
اثرده افغانستان اۉزبېکلری تیلی‌نینگ بوگونگی حالتی، یازو و املا مسئله‌لری، رقملشتیریش جریانلری، تیل سیاستی همده ملي اۉزلیکنی سقلش بیلن باغلیق معمالر هم یاریتیله‌دی. مۉلف تیلنی فقط علاقه واسطه‌سی صفتیده اېمس، بلکه ملت‌نینگ تاریخي خاطره‌سی، مدني کودی و معنوي تئینچی صفتیده تلقین قیله‌دی.
کتابدن ا‌ۉرین آلگن ایریم مقاله‌لرنینگ اۉزبېک و فارس/دري تیللرده بېریلگنی، مۉلف‌نینگ علمي و مدني ملاقات دایره‌سینی کېنگه‌یتیریش، تورلی تیللرده سۉزلشوچی کتابخوانلرنی مشترک تاریخي و مدني قدریتلر اطرافیده بیرلشتیریشگه اینتیلگنیدن دلالت بېره‌دی.
دوکتور ارال‌نینگ بو قیمتلی کتابی‌ده تیلی‌میزنینگ گرامری حقیده هم اونملی بیلگی و معلوماتلر بېریله‌دی همده کونده‌لیک حیاتده قوللنه‌دیگ ۱۰۰۰ گه یقین انیق اۉزبېکچه سۉزلر دری ترجمه‌سی بیلن کېلتیریلگن.
ایشانه‌میزکی، مذکۉر کتاب عالملر، تدقیقاتچیلر، طلبه‌لر، اۉقیتوچیلر همده ملي تاریخ و مدنیتگه قیزیقوچی کېنگ کتابخوانلر عامه‌سی اوچون فایده‌لی منبع بۉلیب، اولرده آنه تیل، ملي میراث و معنوي قدریتلرگه نسبتن ینه‌ده چوقورراق حرمت و مسۉلیت تویغوسینی شکللنتیریشگه خدمت قیله‌دی.
