استادلر، یازووچیلر، شاعرلر و مدنی فعاللردن قطاری، ۲۹-میزان اۉزبېک تیلی ملی کونی مناسبتی‌گه قیلگنلری صحبتلرده، اوشبو تیلدن قۉللب-قوتلنیش ضرورلیگی، جمعیت‌ده اونینگ اۉرنی مستحکم‌لنیشی، آنه تیلی‌گه تعلیم آلینیش‌گه اعتبار قره‌تیلیش و اونینگ کیله‌سی نسللرگه یېتکزیلیشی‌گه اورغوله‌گنلر.
تیل‌شناس و یازووچی دوکتور عزیزالله ارال جنابلری‌نینگ بو توغریده ایتیشیچه، اۉزبېک تیلی‌گه بغیشلنگن مخصوص ملی کون‌نی بیلگی‌لش مسئله‌سی تیلنی نشانلش اېمس، بلکیم اونینگ جمعیت‌ده‌گی اۉرنی‌نی علمی-ادبی میراثینی و کیله‌جکده‌گی رواجلنیشی استقباللرینی کون ترتیبی‌گه آلیب چیقیش مقصدی‌نی کوزله‌گن.
ارال جنابلری‌گه کۉره، اۉزبېک تیلی ملی کونی یخشی نشانلنیشی اوچون درسلیک و اوقوو ادبیاتینی کوپه‌یتیریش، زمانه‌وی اۉزبېکچه اصطلاحلرنی رواجلنتیریش، علمی و بدیعی ادبیاتلرنی ترقه‌تیش، ایکّی تیل‌لی و ساحه‌وی املاء لغتلر یره‌تیش، خلق آغزه‌کی ایجاد نمونه‌لرنی تۉپلش و علمی اۉرگنیش، اۉزبېک تیلنی دیجیتل محیط‌گه آلیب کېریش و یاشلر ایجادیتی ترغیب قیلیش ۷ تکلیف‌نی ایلگری سۉرگنلر.
شونینگدېک اۉزبېک یازووچی و ژورنالیست‌لردن سیاره رحمانی، اۉزبېک تیلی رواجلنیشی اوچون اۉزبېک خلقی اینیقسه خاتین-قیزلر‌نینگ بو تیل‌ده گپله‌شیش، فرزندلرینی شو تیل‌ده کتاب اوقیتیشلری، قوشیق تینگلشلری و یا حکایه تینگلشلریگه زمینه یره‌تیشی‌ده بورچیگی‌نی بیان قیلگن.
بانو رحمانی‌گه کوره: «اۉزبېک خلقی اینیقسه خاتین-قیزلر‌نینگ اۉزبېک تیلی‌ده گپله‌شیش، فرزندلریمیز‌نی شو تیل‌ده کتاب اوقیشلری، قوشیق تینگلشلری و یا حکایه تینگلشلری زمینه یره‌تیشیمیز بورچیمیز دیر.»
سیاسی فعال و تورکیه‌ده بیلیم یورت استادی عالیه ییلماز، تیل رسمیتی فقط احتفاللر بیلن چیکلنیب قالمه‌ی بلکه بو خصوصده کۉپراق اعتبار قره‌تیلیشی ضرورلیگینی تاکیدله‌گن. بانو ییلماز گه کۉره، تیل‌نینگ فقط گینه خلق آره‌سیده صحبت بۉلیشی یېتمه‌یدی و اونینگ یازیلیش ادبیاتی‌ده هم تاثیر تشله‌شی اوچون رسمیات‌ده باشقه تیللر بیلن مساوی حق‌گه اېگه بۉلیشی کېره‌ک.
عالیه ییلماز، بیر ملت‌نینگ حقی‌نی قورینیشی اوچون آنه تیلی‌نینگ تضمینی، آنه تیلی گه تعلیم آلینیشی و آنه تیلی حقلری گه قاوویلیشی‌نی شرط دېگن.
فاریاب سابق والیسی نقیب‌الله فایق جنابلری، اۉزبېک تیلی ملی خلق تامانیدن کوتیب آلینگن مهم سنه‌گه اَیلنگنینی تاکیدله‌ب و تیل رواجی توغریسیده ایتیشیچه: «بارلیگی‌میز‌نی کورستسه‌ک، تاریخی‌میز‌نی باشقه‌لرگه تانیشتیرسک، بیر یېرگه بیره‌م آلیب و افغانستان گه قنچه بارلیگیز‌نی و قنچه بای‌لیگیمیزنی فرهنگی لحاظ‌دن کۉرستسک.»
شونده‌ی بیرحالده، اۉزبېک تیلی رواجلنیشی اوچون شاعرلر، یازووچیلر و یاش فعاللر هم بو توغریده تکلیف و توشینچه‌لرینی بېلدیرگنلر.
شاعر و خطاط تاج‌محمد اېلسیورنینگ ایتیشیچه، آنه‌لر آرقه‌لی تیل رواجلنه‌دی و آنه تیلی اوچیریلگنی پیت، بیر ملت یوقاله‌دی. «بیز تیلی‌میزنی رواجلنتیریش و قۉللب-قوتلش اوچون بیرینچی‌ده آنه‌لریمیز‌نی قۉللب-قوتلشی‌میز، آنه‌لر سیسی‌نی چیقریشیمیز کېره‌ک. آنه‌لر آرقه‌لی تیل یوکسله‌دی، آنه تیلی‌نی اوچیرگنی‌میزده تیلنی اوچیرگنی‌میز کبی بوله‌میز، تیل اوچگنی‌ده اېسه تیل یوقاله‌دی و تیل یوقالگنی‌ده بیر ملت یوقاله‌دی.»
یاش فعاللردن عبدالمالک خادم‌اوغلو گه کۉره، هیچ بیر تیل اۉتگن تاریخی بیلن تیریک قاله آلمه‌یدی اونینگ کیله‌جکی بوگونکی نسلنینگ قنچه اوقیشی، یازشی و سوزلشی‌گه باغلیق.
خادم‌اوغلو‌نینگ کوپه‌یتیریشیچه، تیلنی اسره‌شی قدیمی سۉزلرنی اسره‌ش اېمس، زمانه بیلن بیرگه یوریش، تازه علمی-فرهنگی اصطلاحلرنی ایشله‌تیش، باله‌لر اوچون کتابلر یازیلیش، ترجمه‌لر قیلیش، اۉزبېکلر تاریخی‌نی اۉز تیلیمیزگه ثبت قیلیش و انترنت آرقه‌لی اۉز تیلیمیزده نرسه یازیش ضرور مسئله دیر.
استادلر و یاش فعاللر‌نینگ فکری‌گه قره‌گنده، اولرنینگ نظریدن اۉزبېک تیلی‌نی اسره‌ب قالیش و رواجلنتیریش رسمی، تعلیمی، ادبی و مدنی ساحه‌لرده کیت‌مه-کیت سعی‌وحرکتلرنی طلب قیله‌دی. بو جریانده عایله‌لر، آنه‌لر، شاعرلر، یازووچیلر و یاش نسلنینگ هر بیری مهم اۉرین‌گه اېگه دیر.
