سمنگان، غور و لغمان ولایتلریده یوز بېرگن یۉل حادثه‌لری عاقبتیده، ۱۶ کیشی اۉلیب و ۱۹ کیشی یره‌لنگن.
یېتکرمه‌لرده ترقه‌تیلگن خبرلرگه کۉره، سمنگان ولایتی تاشقرغان تومنی‌ده اَیری ایکّی ترافیکی حادثه‌سی یوز بېرگن. بو حادثه‌لردن بیرینچیسی شباغلی کوتلی یۉلیده «کرولا» رسوملی بیر موترنینگ «هینو» رسوملی بیر موتر بیلن تۉقنه‌شگنی نتیجه‌سیده یوز بېریب و نتیجه‌ده، اوچ کیشی اۉلیب و بیر کیشی یره‌لنگن.
شونینگدېک تاشقرغان‌نینگ خواجه غایب حدودیده هم «کرولا» رسوملی بیر موترنینگ یۉلدن چیقیب کېتیب، اغدیریلگنی عاقبتیده یوز بېرگن ایکّینچی حادثه‌ده بیر کیشی جان بېرگن.
شونده‌ی بیرحالده، طالبان‌نینگ غور حاکمی یېتکرمه‌لر اداره‌سی، اۉتگن کون کیچ قورون بو ولایت‌نینگ لعل‌وسرجنگل تومنی‌ده یۉل حادثه‌سی یوز بېرگنینی معلوم قیلگن.
بو حادثه توی‌دن قیته‌یاتگن «فلانکوچ» رسوملی بیر موترنینگ «تلخک» منطقه‌سیده یۉلدن چیقیب کېتیب، اغدیریلیشی نتیجه‌سیده یوز بېرگن. اوشبو واقعه‌ده کیلین و کییاو‌نینگ آنه‌سی شامل ۵ کیشی اۉلیب و ۱۶ کیشی یره‌لنگن.
شونده‌ی بیرحالده، لغمان ولایتی قرغه‌یی اولسواللیگی‌ده یوز بېرگن یۉل حادثه‌ده ییتی کیشی اۉلیب و ایکّی کیشی یره‌لنگنیدن هم خبر ترقه‌تیلگن.
مذکور حادثه «سراچه» رسوملی بیر موترنینگ ریکشا بیلن تۉقنه‌شگنی عاقبتیده یوز بېریب و ترانسپورت واسطه‌لر دریاگه قۉله‌ب توشگن.
ایتیش کېره‌ک که، افغانستانده یوز بېره‌دیگن ترافیک حادثه‌لردن کۉپینچه‌سی‌نینگ سببی، هیداوچیلر‌نینگ دقت‌سیزلیگی، تیز هیده‌شی و یۉللر بۉزوق‌لیگی دېیله‌دی.
