امریکا قوشمه ایالتلری نینگ جمهورلیک ریاست سیلاوی نتیجهسی اساسیده، بو مملکت سیاسی کوچی، ینه بیر دورهده جمهوریخواه حزبیدن بۉلمیش دونالد ترامپ اختیاریده قۉییلدی.
دونالد ترامپ قیته جمهور باشلیغ بۉلگنی دنیا مملکتلری تامانیدن تورلی خیل فکرلر و امیدلر بیلن کوتیب آلیندی.
بو ییرده طالبان یانیده، دنیا باشقه بیر قنچه مهم مملکتلر رسمیلری، ترامپ غلبهسینی قندی کوتیب آلگنینی یازیب اۉتماقچینمیز.
طالبان
امریکا جمهورلیک ریاست سیلاوی نتیجهسی بیللی بۉلیشی بیلن طالبان تشقی ایشلر وزیرلیگی، بیر بیانات نشر قیلیب، امریکا بیلن طالبان ارا علاقهلر باشلهنیشیگه امید بیلدیرگن.
بوندن ایلگری طالبان سۉزلاوچیسی اۉرین باسری حمدالله فطرت هم، امریکاده کیم قدرتگه کېلیشیدن قطعینظر بو مملکت، طالبان حاکمیتی آستیده بۉلگن افغانستانگه قرشی ایجابی فکری بۉلیشیگه امید بیلدیرگن اېدی.
اۉزبېکستان
اۉزبېکستان جمهور باشلیغی شوکت میرضیایف بیر قوتلاو پیام آرقهلی، دونالد ترامپنی قیته امریکا جمهور باشلیغی بۉلیشی بیلن تبریکلگن.
اۉزبېکستان جمهور باشلیغی اۉزی نینگ بیاناتیده، تاشکینت و واشنگتن دیسی آرهسیده دوستانه علاقه و شیریکلر دوام اېتیشینی اورغولهشگن.
شونینگدېک اۉزبېکستان جمهور باشلیغی شوکت میرضیایف، ترامپ نینگ بیرینچی دور جمهور باشلیغلیک زمانیده، آقسرایگه بۉلگن سفری جریانیده امضالنگن تورلی ساحهلردهگی شرطنامهلر امریکا و اۉزبېکستان آرهسیدهگی علاقهلرنی کوچهیتیرگن و بو علاقهلر کوچلی دوام اېتیشیگه امید بیلدیرگن.
عینی حالده اۉزبېکستان جمهور باشلیغی ترامپنی تجربهلی و ماهر سیاستچی بیان قیلیب، اونینگ سیاستی دنیا ترقیاتی اوچون بۉلیشیگه امید بیلدیرگن.
تورکیه
تورکیه جمهور باشلیغی رجب طیب اردوغان، بیر بیانات ترقهتیب، ترامپنی غلبهسی بیلن تبریکلگنی یانیده، بوندن کیین دنیادهگی جاری توسقینلیکلرگه نقطه قوییلیشی اینقسه غزه و اوکراینده جاری اوروشلر یکونلنیشی اوچون اونملی بیر قرار آلینیشیگه امید بیلدیرگن.
روسیه
امریکا قوشمه ایالتلری نینگ دنیا سیاستیده ییریک رقیبی بۉلمیش روسیه مملکتی نینگ جمهور باشلیغی، حاضرگه قدر امریکاده اورتهگه کېلگن، بو اوزگریش خصوصیده بیران فکر بیلدیرمهگن.
روسیه جمهور باشلیغی نینگ سۉزلاوچیسی دیمیتری پسکوف، ژورنالیستلر بیلن اۉتکزگن صحبتلریده، روسیه جمهور باشلیغی دونالد ترامپ غلبهسیگه مناسبت بیلدیریشی تۉغریسیده بیلگیسی یۉقلیگینی بیلدیرگن.
عینی حالده پسکوف، روسیه دونالد ترامپ نینگ بو مملکتگه قرشی بۉلگن بیاناتلرینی نظرگه توتگن حالده، بو خصوصده فکر بیلدیریشینی اورغولهگن.
اوکراین
امریکا قوشمه ایالتلری نینگ حربی و مالی یاردمی بیلن، روسیهگه قرشی توریب تۉختهگن اوکراین رهبری ولادیمیر زیلینسکی هم ترامپ غلبهسی بیلن تبریکلگن.
ولادیمیر زیلینسکی اۉزی نینگ ایکس صحیفهسیده، دنیا تینچلیگی اوچون دونالد ترامپ سیاستنی قدرلهگن.
اسراییل و حماس
غزهده قانلی اوروشده بۉلیب تورگن اسراییل مملکتی و حماس گروهی رهبرلری هم امریکاده یوز بېرگن بو سیاسی اوزگریش تۉغریسیده مناسبت بیلدیرگن.
اسراییل باش وزیری بنیامین نتنیاهو، دونالد ترامپ دوریده اسراییل و امریکا آرهسیدهگی بیرلیک کوچهیشینی اورغولهگن.
عینی حالده اسراییل رقیبی، حماس گروهی نینگ سیاسی بولیم رسمیلری هم بیانات نشر قیلیب، ترامپدن غزه اوروشینی یکونلنتیریشی اوچون بېرگن سۉزلرینی عملگه آشیریشینی سۉرهگن.
شونینگدیک بریتانیا، جرمنی، جاپان، هند، فرانسه، سعودی عربستان، کانادا و دنیا باشقه بیر قنچه مملکتلری نینگ رهبرلری هم مناسبت بیلدیریب، امریکا بیلن مملکتلری علاقهلری کوچهیشیگه امید بیلدیرگنلر.
