پاکستان مملکتی نینگ افغانستان بوییچه مخصوص وکیلی صادق خان، بو مملکت بیر هیاتی باشچیلیگیده کابل کېلگن.
دېیرلی بو سفردن اساسی مقصد، پاکستان و طالبان آرهسیدهگی قرمه-قرشیلیکلرگه ییچیم یۉل تاپیش دېب معلوم قیلینگن.
طالبان حاکمیتی ایچکی ایشلر وزیرلیگی نینگ سۉزلاوچیسی عبدالمتین قانع بیر بیانات نشر قیلیب، پاکستانلیک بو هیات سراج الدین حقانی بیلن اوچرهشگنیدن خبر بېردی.
بو اوچرهشووده، طالبان ایچکی ایشلر وزیرلیگی نینگ سرپرستی پاکستان و طالبانارا قرمه-قرشیلیکلر سۉزلشوو آرقهلی حل اېتلیشینی تکلیف قیلگن.
طالبان افغانستان سابق حکومتی قرشیسیده کۉپینچه فعالیتلرینی پاکستاندن توریب باشقیرگنی باعث، بو مملکت و طالبان آرهسیده یخشی علاقه اورنهتیلیشی کوتیلگن اېدی. بیراق اخیرگی ییللر ایچیده طالبان و پاکستان آرهسیده کۉپلب مسالهلر اوستیده جنجللر تورگن.
پاکستان حکومتی، طالبان حاکمیتی آستیده بۉلگن افغانستانده ترورچی گروهلر حضوری بار دېب تاکیدلب کېلماقده دیر.
