اوزاق ییللیک غربتدن کېین سونگی وقتلر ایچیده، ایران حکومتی تامانیدن مجبوری چیقاریلگن، قندوزلیک عایله اۉز وطنی تامانیدن هم ایلیق کوتیلیب آلینمه‌گنیدن شکایت قیله‌دی.
قندوز شهری بیر چیککه‌سیده آغیر شرایطده تیریکچیلیک قیلیب تورگن بو عایله‌لردن بیری اۉزبېک تی‌وی ژورنالیستی‌گه ایش‌سیزلیک، قشاق‌لیک، ناانیق کېله‌جک و شونگه اوخشش تیریکچیلیکلری اوستیده سایه سالگن کۉپلب تیریکچیلیک تشویش‌لریدن شکایت قیله‌دیلر.
بیر نیچه باله نینگ آنه‌سی بۉلگن بو خانه‌دان عیالی نینگ اۉزبېک تی‌وی گه ایتیشیچه “اۉن ییل ایران‌ده یشه‌گنیمیزدن کېین بیز چیقاریلدیک بو ییرده تیریکچیلیک وضعیت‌میز جده آغیر دیر. بو اۉتکزیب تورگن وضعیتده باشقه آدملر بۉلسه ممکن سکته قیلسه شونچه آغیر شرایطده میز.”
ایران‌دن عایله‌لری بیلن چیقاریلگن قندوزلیک ایرکک‌لر، روزغارلرینی تیبره‌تیش اوچون مردکارلیک و دکان‌دارلیک کبی کۉپلب ایش‌لرگه هم قۉل اۉرگن. بیراق هلی گچه عایله‌سی اوچون ییترلیچه نان تاپیش‌گه قادر بۉلگن اېمس.
اولردن بیری نینگ ایتیشیچه “افغانستان‌ده ایش جوده آز بۉلگن ایش‌لرنی هم تانیشی و واسطه‌سی بارلر آله‌دی. منه مین بیر آی ایچیده اۉن کون ایشله‌یمن و ۲۰ کون بیکارمن.“
قندوزده قیتیب کېلگن بو مهاجرلرنینگ ایتیشیچه، حاضرگه قدر اولرگه هیچ قندی انسان‌پرورلیک یاردم هم کۉرسه‌تیلگن اېمس. حال بو که میلیارلرچه یاردم خلق‌ارا هم‌جمعیتی تامانیدن، شوندی شخص‌لر قوللب-قوتلنیشی اوچون افغانستان‌گه کۉرسهتیلماقده دیر.
ایران‌دن چیقاریلگن عایله قیزی نینگ تشویشی آغیرراق دیر. چونکه حاضر افغانستان‌گه مجبوری قیتریلگن بوندی قیزلر اوچون شرایط جدی آغیر دیر و اولر اۉقیش کبی اساسی حقلریدن محروم دیر. شو محروم‌لیک بو عایله نینگ قیزینی هم تون‌وکون خواطرلنتیریب قویگن. بیراق افغانستان‌ده حاکم شرایط و قورقینچ‌لر سبب او آوزاینی چیقرالمه‌یدی.
اۉزبېک تی‌وی بیلن صحبت اۉتکزگن بو قیزلردن بیری کونگیلی توله قیغو و کۉز یاشی بیلن ایتیشیچه ” بو ییرده تحصیل قیلالمه‌یمیز چون قیزلرگه حق یۉق، کۉپ خواهله‌یمن درس اۉقیب بیر ییرده ییتیشسم اما حاضر بونگه حقیم یۉق دیر. بو ییرده یکه کۉچه‌گه چیقالمه‌یمیز و بو ییرده حتا کورس اۉقیش‌گه قادر اېمس‌میز. ایران‌ده آلتینچی صنف‌گه قدر درس اۉقیدیم حاضر بو ییرده تۉخته‌تیلدی”
ایتیش کېره‌ک که اخیرگی وقتلر ایچیده، هر کونی مینگلرچه عایله ایران‌دن چیقاریلیب، افغانستان‌ده شوندی ناانیق کېله‌جک بیلن یوز مه یوز بۉلماقده دیر
