سمنگان ولایتی تاشقُرغان تومنیده‌گی زلزله‌دن آغیر زیان کۉرگن قیشلاقلردن ینه بیری «عرب بیک» قیشلاغی دیر. زلزله طفیلی اهالی حیاتی توپراق آستیده قالگن. بو قیشلاق‌ده، لای‌دن توزالگن اهالی‌نینگ باش پناه‌سی بۉلمیش اوی‌لرده‌گی هر یاریلگن دیوار، هر بیر قوله‌گن تام، بو ییرده یشه‌یاتکن زلزله جبردیده‌لری‌نینگ آغریقلی حکایه‌سینی اَیته‌دی.
بو ییرده اۉنلب اوی قوله‌گن یا هم ویرانگرلیککه اوچره‌گن، بیراق شوندی بۉلسه هم بو خرابه‌لر آره‌سیده هنوز حیات‌نینگ ایزلری کۉرینه‌دی. سونگی زلزله نتیجه‌سیده کۉپلب اوی‌لرده فقط دیوارلر بوزیلمه‌دی، بلکه آدملرنینگ ییللیک محنتی و تینچی هم بوزیلدی.
تاشقُرغان‌نینگ عرب‌بیک قیشلاغیده، عیاللر و ایرکک‌لر زلزله‌دن کېین اوی‌لریگه قیتیب، چوکیب توپراققه اَیلنگن دیوارلر آره‌سیدن، روزغارلری ایدیش‌لرینی قیدیرماقده تا که بو ایدیش‌لر بیلن ینگی بیر حیات باشلسه‌لر.
بو قیشلاق‌ده‌گی زلزله‌دن جبر کۉرگن اهالی، ینه عادی حیات‌گه قیتیشی اونچه‌لیک هم قوله‌ی اېمس. اولر زلزله‌ده کۉپ نرسه‌لرینی قۉلدن بېرگن، باش پناه‌لریگه قوشیمچه اوی ایدیش‌لری هم ییر بیلن یکسان بۉلگن، شو اوچون اولر ینه بیر تیریکچیلیک باشلش اوچون یاردم کۉتماقده؛ بیراق حاضرگچه اولرنی قۉلینی توتیش اوچون قانقرلی یاردم کۉرسهتیلمهگن. بوندن کېین اولرگه یاردم کۉرسه‌تیلگن تقدیرده، قنچه‌لیک بو یاردملر ینگی بیر تیریکچیلیک‌نی باشلش اوچون اهالیگه یاردم بېره‌دی هلی بیللی اېمس.
عرب‌بیک بو فاجعه‌دن رنج تارتیب تورگن یککه قیشلاق اېمس، شوندی کۉپلب قیشلاق و چیککه حدودلری بار که یوزلب اهالی زلزله‌دن کېین، بوزوق و ویرانه اوی‌لرده ینه قندهی حیات باشلش‌لری ممکن‌لیگیدن تشویش‌ده توشیب قالگن. شوندی آغیر شرایطده اولرنی امیدی بیرینچی خدا و کېین اېسه یاردم بیرووچی تشکیلاتلر تامانیدن قوللب-قوتلنیش‌لری دیر.
بو امید شوندی بیرحالده دیر که حاضرگچه، اولرنینگ احوالی‌گه ییتیشیش اوچون اونچه‌لیک اعتبار قرهتیلمهگن. اهالی معلوماتیگه کۉره، احواللر یاردم بیرووچی تشکیلاتلر تامانیدن تیکشیریلیب کېتگن، بیراق یاردمگه قۉل تاپالمه‌گنلر.
