پاکستان اوردوسی استخبارات خدمتینینگ (آیاسآی) سابق باشلیغی فیضحمید حربي محکمه تامانیدن۱۴ ییل قماق جزاسیگه حکم قیلینگنی حقیده خبر بېریلدی.
پاکستان اوردوسی مطبوعات بۉلیمی نینگ معلوم قیلیشیچه، فیض حمیدگه قرشی حربي محکمه جریانی ۲۰۲۴-ییل ۱۲-اگستده پاکستان اوردوسی قانونلری اساسیده باشلنیب،۱۵ آیدن کۉپراق دوام اېتگن.
اوردونینگ بیاناتیده فیض حمید سیاسي فعالیتلرده اشتراک اېتیش، دولت مخفيلیک قانونینی بوزیش، مملکت خوفسیزلیگی و منفعتلریگه ضرر یېتکزیش، صلاحیت و دولت منبعلرینی سوءاستعمال قیلیش همده شخصلرگه ناقانوني ضرر یېتکزیش کبی عیبلر بیلن محکمه قیلینگنی قید اېتیلگن.
حربيلر مطبوعات خدمتی، اوزاق و مشقتلی حقوقي جریانلردن سۉنگ، عیبلنووچی برچه مادّهلرده عیبدار دېب تاپیلدی و حربي محکمه تامانیدن۱۴ ییل قماق جزاسیگه حکم قیلیندی. بو حکم ۲۰۲۵-ییل ۱۱-دسامبریده اعلان قیلینگن.
اوردونینگ ینه قۉشیمچه قیلیشیچه،«محکوم نینگ سیاسي گروهلر ایچیدهگی اَیریم شخصلر بیلن بیرگه سیاسي بېقرارلیک و ترتیبسیزلیکلرنی کوچهیتیریشدهگی رۉلی علیحده اۉرگنیلماقده.»
پاکستان استخبارات ادارهسی نینگ سابق باشلیغی اۉتگن ییلی، ۲۰۲۴ییل اگست آییده اوردو نینگ اۉزی تامانیدن صلاحیتلی سوءاستعمال قیلیش و اوردونینگ ایچکی قانونلریگه خلاف ایشلر قیلیش عیبلاوی بیلن حبسگه آلینگن اېدی.
اوردونینگ مطبوعات بۉلیمی معلوماتیگه کۉره، حمید رسمي روشده ۲۰۲۴ بیر نېچته جنایتلرده، جملهدن سیاسي فعالیتلرده قتنهشیش و دولت مخفيلیک قانونینی بوزیشده عیبلنگن.
فیض حمید ۲۰۱۹-ییلده عمران خان تامانیدن آ اس آی رهبری اېتیب تعیینلنگن و ایکّی ییلدن آرتیق وقت دوامیده اوشبو لوازمده ایشلهگن.
او ۲۰۲۱-ییلده، طالبان حاکمیتگه قَیتگچ، کوتیلمهگن طرزده کابلگه باریب، طالبان نمایندهلری بیلن اوچرهشگن اېدی. بو سفری هنوزگچه کېسکین تنقید قیلینیب کېلماقده.
