افغانستان قیرغیز سودا علاقهلری کنفراسی طالبان نینگ صناعت و سودا وزیری نورالدین عزیزي همده قیرغیزستان جمهوریتی اقتصادیات و سودا وزیری محترم بیکیت صدیکوف اشتراکیده، شونینگدېک ایکّی مملکت خصوصي سکتوری وکیللری نینگ کېنگ قتنهشوویده بۉلیب اۉتدی. کنفراس یکونیده تورلی ساحهلرده عمومي قیمتی 156 میلیون امریکا دالریدن آرتیق بۉلگن سودا کېلیشوولری امضالندی.
مذکور کېلیشوولر افغان و قیرغیز تدبیرکارلری اۉرتهسیده اۉتکزیلگن یوزمه-یوز تجارت اوچرهشوولری نتیجهسیده امضا بۉلیب، اولر آلتین، پایافزار، تیلیکام، کانچیلیک و انترنت، لوژستیک ترانسپورت، اېکینچیلیک، قوریلیش همده بانک ساحهسی یۉنهلیشلرینی قمرب آلهدی. اوشبو بیتیملر ایکّی مملکت اۉرتهسیدهگی اقتصادي همکارلیکنی کېنگهیتیریش و اۉزارا سودا حجمینی آشیریش یۉلیده مهم قدم صفتیده بهالنماقده .
طالبان صناعت و سودا وزیری نورالدین عزیزي کنفراسده سۉزگه چیقیب، ایکّی مملکت اۉرتهسیده امضالنگن یۉل خریطهسی همده اقتصادي و سودا همکارلیگی بۉییچه انگلشووی اقتصادي علاقهلر اوچون عملي اساس بۉلیب خدمت قیلیشینی تأکیدلهدی. شونینگدېک، او قیرغیزستان سودا اویی نینگ افغانستانده آچیلیشی و افغانستان سودا اویینی قیرغیزستانده آچیش رېجهسی اوشبو کېلیشوولرنی عملده رۉیابگه چیقریشده مهم رۉل اۉینشینی قید اېتدی.
اۉز نوبتیده، قیرغیزستان جمهوریتی اقتصادیات و سودا وزیری بیکیت صدیکوف هم سۉز آلیب، ایکّی مملکت نینگ منطقهدهگی ستراتیژیک اۉرنیگه تۉختهلیب اۉتدی همده امضالنگن 156 میلیون دالرلیک کېلیشوولر قۉشمه تجارتنی رواجلنتیریش، ترانزیت امکانیتلرینی کېنگهیتیریش و اۉزارا سودانی کوچهیتیریشگه خدمت قیلیشینی تأکیدلهدی.
شونی ایتیش کېرهک که، کنفراس دایرهسیده هر ایکّی مملکت تامانیدن تجارت امکانیتلری بۉییچه تقدیماتلر اۉتکزیلیب، خصوصي سکتور وکیللرینی کېلگوسیده همکارلیککه جلب اېتیش مسألهلری بحث قیلیندی..
