روسیه عاموی اخبارات واسطهلرینینگ خبر بېریشیچه، مسکونینگ جنوبیده یوز بېرگن پارتلش عاقبتیده ایککی نفر پولیس خادیمی و هجومچی هلاک بۉلگن، ینه ایککی نفر پولیس یرهلنگن.
تاس اخبارات آژانسی معلومتیگه کۉره، پارتلش بوگون چهارشنبه ۳-جدی اېرتهلب مسکونینگ یلتسکایا کوچهسیده یوز بېرگن.
روسیه تېرگاو کمیتهسی پارتلش پولیس خادملری اۉز موتری یقینیده شبههلی شخصنی کۉریب، اونی قۉلگه آلیشگه اورینگن پیتده یوز بېرگنینی معلوم قیلدی.
کمیته بیلناتیگه کۉره، پولیس خادملری شبههلی شخصگه یقینلشگن لحظه پارتلوچی ماده ایشگه توشگن و نتیجه ده ایککی نفر پولیس خادیمی همده گمانلنوچی هلاک بۉلگن.
روسیه تېرگاو کمیتهسی حادثه جایده تېکشیروو ایشلری دوام اېتگنینی و حاضرگچه قۉشیمچه تفصیلاتلر انیقلنمهگنینی بیلدیردی.
شونېنگدېک، ایککی کون آلدین مسکونینگ جنوبی-غربیده هم پارتلش یوز بېریب اونده روسیه ارتیشینینگ یوقاری مرتهبهلی جنرالی هلاک بۉلگن اېدی.
جنرال یاروسلاو موسکالیک جاری ییل نینگ اپریل آییده مسکوده موتر پارتلشی عاقبتیده هلاک بۉلگن، جنرال ایگور کیریلوف اېسه ۲۰۲۴ییل دسمبر آییده مصافه دن باشقریلهدیگن بامبه پارتلشی نتیجهسیده وفات اېتگن.
