طالبان نینگ سۉزلاوچیسی ذبیح الله مجاهد ایکس اجتماعی ترماغیدهگی رسمی صحیفهسیده معلوم قیلیشیچه، اۉتگن ییل دوامیده افغانستان بۉیلب ۳۵۲۲۸ته معتاد شخص دوالنیشدن اۉتکزیب، نورمال حیاتگه قیتریلگن. شونینگدیک، او مملکت نینگ ییریک شهرلریده ۱۰۶۶۴ نفر تیلنچی ییغیب آلینیب، رویختگه آلینگنی و هر بیر قشاق شخصگه ۲۰۰۰ افغانی مقداریده نقد پول یارمی بېریلگنی حقیده ایتگن.
اوشبو بیانتگه کۉره، طالبان مسوولری بو چارهلرنی قشاقلیک، معتادلیک و تیلنچیکنی آزهیتیریشگه قرهتیلگن اجتماعی دستورلر نینگ بیر قسمی صفتیده تقدیم اېتیب، محتاج شخصلرنی انیقلش و اولرگه یاردم کۉرسهتیش جریانی دوام اېتیشینی تاکیدلهگن.
شو بیلن بیرگه، اۉزبېک تی وی منبعلریگه تهیهنب خبر بېریلیشیچه، افغانستان نینگ برچه ولایتلریده اقتصادی و اجتماعی احوال هنوز ضعیفلیگیچه قالماقده. اوشبو منبعلر نینگ بیلدیریشیچه، اینقسه یاشلر آرهسیده ایشسیزلیک درجهسی آشگن، دولت و خصوصی سکتورلرده برقرار ایش اۉرینلری کېسکین آزهیگن.
اۉزبېک تی وی نینگ منبعلری، شونینگدیک، اقتصادی لایحهلر و سرمایه یاتقیزوچیلر نینگ تۉختهتیلیشی یا که قیسقرتیریلیشی نتیجهسیده مملکت بۉیلب کۉپلب کیچیک و اۉرته بیزنیس ایشلری قولهشگه یوز توتگن یاکه بوتونلهی یاپیلگنی حقیده خبر بېرماقده. بو حالت عایلهلر ضمهسیدهگی تیریکچیلیک باسیمنی ینهده کوچهیتیرگن.
منبعلرگه کۉره، قیسقه مدتلی نقد پول یاردملر ایریم شاشیلینچ احتیاجلرنی قسما قاپلشی ممکن، بیراق بندلیکنی تامینلش، بیزنیسنی قۉللب-قوتلش و بیرقرار اقتصادی امکانیتلرنی یرهتیشگه قرهتیلگن کېنگ قمراولی دستورلر بۉلمسه، قشاقلیک، تیلنچیلیک و اجتماعی معمالر دوام اېتهبېرهدی
