چین و پاکستان تشقی ایشلر وزیرلری یېتّینچی ملاقات یکونیده اعلام قیلینگن قۉشمه بیاناتده، خلقارا همجميت بیلن همکارلیکده طالباننی سیاسي تیزیم یرهتیشگه، اعتدال سیاست یوریتیشگه، رواجلنیشگه اعتبار قرهتیشگه، یخشی قۉشنیچیلیک تمایللریگه عمل قیلیشگه و افغانستان نینگ برقرار رواجلنیشی همده خلقارا همجمعیت قۉشیلیشیده اۉنیملی رۉل اۉینشگه اوندهشلرینی بیلدیردی.
ایکّی تامان افغانستان مسألهسی بۉییچه یقین علاقه و موافقلشتیریشنی دوام اېتتیریشینی تأکیدلهدی. شونینگدېک، طالباندن افغانستانده جایلشگن برچه ترورچی گروهلرنی توگهتیش و بو گروهلر نینگ افغانستان توپراغیدن باشقه دولتلرگه قرشی فایدهلنیلیشی نینگ آلدینی آلیش بۉییچه انیق، عملي و تېکشیریلهدیگن چارهلر کۉریشنی طلب قیلدی.
وزیرلر افغانستاندهگی ترورچی گروهلر منطقوي و جهانی خوفسیزلیک اوچون جدّي تهدید بۉلیب قالهیاتگنینی قید اېتدی. اوشبو ملاقات کېچه پیکیگنده بۉلیب اۉتدی.
چین طالبان بیلن یقین علاقهلرگه اېگه بۉلسه-ده، پاکستان اولر بیلن ضدیتده بۉلیب، طالباننی تی تی پی کبی پاکستانلیک جنگریلرگه باشپناه بېریشده عیبلهیدی. طالبان اېسه بو عیبلاولرنی رد اېتیب، تی تی پی مسألهسینی پاکستان نینگ ایچکی معماسی دېب حسابلهیدی.
