بیرلشکن ملتلر تشکیلاتی نینگ مخدره مادّهلر و اویوشگن جنایتچیلیککه قرشی کورهش بۉییچه ادارهسی ایتالیا حکومتی افغانستاندهگی ضعیف احوالدهگی عیاللر و یاشلرنی قۉللب-قوّتلش اوچون بیر میلیون یورو اجرهتگنینی معلوم قیلدی.
مذکور اداره بوگون سهشنبه ، 23- جدی اعلام قیلگن بیاناتیده، بو یاردم هرات و ننگرهار ولایتلریده آلتی مینگ و 797 نفر عیال و یاشنی قۉللب-قوّتلشگه یۉنهلتیریلیشینی بیلدیردی.
بیاناتده شوندهی دېیلهدی: «ایتالیا حکومتی افغانستانلیک عیاللر و یاشلرنینگ فراوانلیگینی قانوني درآمد امکانیتلرینی کېنگهیتیریش آرقهلی یخشیلش لایحهسینینگ ایکّینچی باسقیچینی مالیهلشتیریشنی تصدیقلهدی. بو اېسه هرات و ننگرهار ولایتلریده لایحهنینگ بیرینچی باسقیچیده اېریشیلگن نتیجهلرنی مستحکملشگه قرهتیلگن»
معلوماتگه کۉره، لایحه 2024-ییلده باشلنگنیدن بویان هرات و ننگرهار ولایتلریدهگی بېش تومن، 93 قیشلاقده کۉکنار یېتیشتیریشدن ضرر کۉرگن قریب بیش مینگ و 514 نفر ضعیف عایلهگه قانوني و برقرار درآمد امکانیتلری یرهتیلدی.
بیرلشکن ملتلر تشکیلاتینینگ افغانستان بۉییچه مخصوص ایشانچ جمغرمهسی ایتالیا تامانیدن اجرهتیلگن مالیوي یاردم حقیده تخمیناً بیر هفته آلدین خبر بېرگن اېدی.
بیرلشکن ملتلر تشکیلاتینینگ تأکیدلهشیچه، 2026-ییلده افغانستانلیکلرنینگ شاشیلینچ بشردوستانه احتیاجلرینی قاندیریش اوچون قریب 1،71 میلیارد امریکا دالری مقداریده مبلغ ضرور.
