پاکستان تشقی ایشلر وزیرلیگی هندستان تامانیدن پاکستانده تروریزمنی مالیهلشتیریش و اونگه یاردم بېریلگنینی تصدیقلاوچی «انکار اېتیب بۉلمهیدیگن دلیللر» بارلیگینی معلوم قیلدی. وزیرلیککه کۉره، دهلی تامانیدن قۉللب-قوّتلنهدیگن ترورچی ترماقلر منطقهده، جملهدن افغانستانده هم انیقلنگن.
پاکستان تشقی ایشلر وزیرلیگی مطبوعات سۉزلاوچیسی طاهر حسین اندرابی پنجشنبه کونی، 25- جدی اسلامآبادده اۉتکزیلگن مطبوعات ییغینیده هندستان اوردوسی رهبری نینگ سۉنگگی بیاناتلرینی «اساسسیز و سیاسي مقصدلی» دېب اتهدی. اونینگ ایتیشیچه، دهلی بوندهی دعوالر آرقهلی منطقهنی بېقرارلشتیریشدهگی اۉز رۉلینی یشیریشگه اورینماقده.
اونگه کۉره: «هندستان تامانیدن پاکستانده تروریزمنی مالیهلشتیریش و اونگه کمکلشگنیگه عاید انکار اېتیب بۉلمهیدیگن دلیللر موجود. هندستان قۉللب-قوّتلهیاتگن ترورچی ترماقلر منطقهده، جملهدن افغانستانده انیقلنگن.»
پاکستان رسمیسینینگ قۉشیمچه قیلیشیچه، هندستان حربي رسميلرینینگ پهپادلر کیریب کېلگنی حقیدهگی دعوالری تکراري و چلغیتووچی بۉلیب، بو مملکت نینگ خلق ارا نفوذیگه ضرر یېتکزهدی.
بو بیاناتلر اسلام آباد و دهلی اۉرتهسیدهگی کېسکینلیک سۉنگگی آیلرده کوچهیگن بیر پیتده ینگرهماقده. پاکستان بیر نېچه بار هندستاننی پاکستان ایچیده و قۉشنی دولتلرده قوراللی گروهلر همده ترورچی ترماقلرنی قۉللب-قوّتلشده عیبلهگن.
پاکستان رسميلری آلدین هم خلقارا تشکیلاتلرگه هندستان نینگ منطقه خوفسیزلیگینی بېقرارلشتیریشدهگی رۉلی، اینیقسه افغانستان آرقهلی عملگه آشیریلهیاتگن فعالیتیگه عاید حجت و دلیللر تقدیم اېتیلگنینی بیلدیرگن اېدی.
