بیرلشگن ملتلر تشکیلاتی نینگ ترقیات دستوری افغانستان شرقیده قَیتیب کېلگن اهالیگه یاردم بېریش مقصدیده تۉقّیزته باشقه تشکیلات بیلن همکارلیکده «برقرار یېچیملر» قۉشمه لایحهسینی عملگه آشیرهیاتگنینی معلوم قیلدی.
UNDP بوگون یکشنبه، 28-جدی اعلام قیلگن حساباتیده ایتیلیشیچه، مملکتگه قَیتهیاتگن کۉپلب شخصلر جوده کم مال-ملک یاکه جمغرمه بیلن قیتماقده، شونینگدېک، یشش جایی و اۉزلری همده عایلهلری نینگ تیریکچیلیگینی تأمینلش اوچون ایش اۉرینلریگه اېگه اېمس.
گزارشده شوندهی دېییلگن: «افغانستان شرقیده اوشبو معمانی حل اېتیش اوچون بیرلشگن ملتلر تشکیلاتی افغانستان اوچون مخصوص جمغرمه (STFA) مالیوي یاردمیده برقرار یېچیملر قۉشمه لایحهسینی عملگه آشیرماقده، بو لایحه مذکور حدوددهگی قَیتیب کېلگنلرگه یاردم بېریشگه قرهتیلگن.»
دستورمعلوماتیگه کۉره، «برقرار یېچیملر» قۉشمه لایحهسی بو بیرلشکن ملتلرتشکیلاتی آژانسلری نینگ اۉزارا همکارلیکده کۉچیریلگن و قَیتیب کېلگن شخصلر اوچون دایمي و اوزاق مدتلی یېچیملر تاپیشگه قرهتیلگن یاندشوو بۉلیب، اولر نینگ قشّاقلیک و مجبوري کۉچیش بیلن باغلیق کمسیتیشسیز عادي حیات کېچیریشلریگه امکان یرهتیشنی مقصد قیلهدی.
مذکور تشکیلات نینگ قۉشیمچه قیلیشیچه: « UNDP رهبرلیگیده عملگه آشیریلهیاتگن اوشبو قۉشمه لایحه تۉقّیزته بیرلشکن ملتلر تشکیلاتینی اۉز ایچیگه آلهدی: ILO، IOM، FAO، UNDP، UNFPA، UNHCR، UNMAS، UN Women و UN-Habitat. اوشبو اگېنتلیکلر جماعهگه اساسلنگن رواجلنیش یاندشووی آرقهلی اساسي خدمتلر و بازار تیزیملرینی مستحکملش، برقرار و اینکلیوزیو تیریکچیلیک منبعلرینی یرهتیش همده عیاللر نینگ یېتکچیلیگی و امکانیتلرینی کېنگهیتیریشنی قۉللب-قوّتلشگه اعتبار قرهتماقده.»
حساباتده تأکیدلنیشیچه، لایحه برچه فعالیتلریده خاتین-قیزلرنی قۉللب-قوّتلشگه علیحده اورغو بېرهدی، چونکه اولر کوندهلیک حیاتده جدّي تۉسیقلر و کېنگ کۉلملی کمسیتیشلرگه دوچ کېلماقده.
