چهارشنبه کونیگچه افغانستاننینگ شرقي حدودلرینینگ کتّه قِسمیده کوچلی قار یاغیشی کوتیلماقده.
طالبان حکومتینینگ طبیعی حادثهلرگه قرشی کورهش ملی ادارهسی تیناوون شنبه کېچقورون، 4 دلو ایکس اجتماعي ترماغیدهگی بیاناتیده، خلق ارا هواشناسلیک ادارهلریگه تهیهنیب، 8 دلوگچه مملکتنینگ اَیریم ولایتلریده اۉرتهچه یاغینگرچیلیک بۉلیشی، اما شرقي منطقهلرنینگ کېنگ قِسمیده کوچلی قار یاغیشینی معلوم قیلگن.
بیاناتده اهالیدن احتمالي سېل و کوچلی قار یاغیشیگه تیار بۉلیش سۉرهلگن.
شونینگدېک، مذکور اداره هفته باشیدهگی کونلرده هوا کېسکین ساویشینی تخمین قیلگن و اهالیگه، اینیقسه بالهلر و کېکسهلر آرهسیده ساووق بیلن باغلیق کسللیکلرنینگ آلدینی آلیش اوچون ضرور چارهلرنی کۉریشنی توصیه اېتگن.
اوشبو اداره معلوماتلریگه کۉره، اۉتگن هفتهنینگ چهارشنبه کونیدن شنبهگچه 60 نفردن آرتیق کیشی اۉلگن، 100 نفردن کۉپ کیشی یرهلنگن. شونینگدېک، تورلی ولایتلرده کوچلی قار یاغیشی عاقبتیده 458 ته اوی قسماً یاکه تۉلیق ویران بۉلگن.
