بیرلشگن ملتلر تشکیلاتینینگ بالهلر جمغرمهسی (یونیسف)نینگ معلوم قیلیشیچه، بیل و ملیندا گیتس جمغرمهسی افغانستاننینگ شرقي حدودلریده زلزلهدن ضرر کۉرگن بالهلر و عایلهلرگه 600 مینگ امریکا دالری یاردم کۉرسهتهدی.
یونیسفنینگ ایتیشیچه، اوشبو مبلغ آرقهلی قیش موسمیگه عاید شاشیلینچ یاردملر، جملهدن فوق العاده نقد پول یاردمی و خدمت کۉرسهتیش چادرلری تأمینلنهدی. بو اېسه اېنگ ساووق آیلر دوامیده بالهلر و آنهلر اوچون حیاتي مهم قۉللب-قوّتلش نینگ دوام اېتیشیگه امکان بېرهدی.
یونیسفنینگ افغانستاندهگی نمایندهسی تاجالدین اویواله گیتس جمغرمهسی تامانیدن کۉرسهتیلگن بو یاردم نهایتده تنقیدي پلّهده عملگه آشیریلدی، چونکه عایلهلر قیشنینگ اېنگ آغیر هفتهلریگه دوچ کېلماقده دېدی. اوشبو یاردم عایلهلرگه اۉزلرینینگ شاشیلینچ احتیاجلرینی قاندیریشگه یاردم بېرهدی و اېنگ مهمی، قیین قیش شرایطلریگه قرهمهی، خوفسیز مکانلر همده جماعهگه اساسلنگن قۉللب-قوّتلشلر آرقهلی بالهلر و آنهلر اوچون حیات سقلب قالووچی خدمتلر نینگ دوام اېتیشینی تأمینلهدی.
۲۰۲۵ییل اگست آیینینگ آخریده افغانستاننینگ شرقي ولایتلریده ۶رشتر زلزله یوز بېردی.
بیرلشگن ملتلر تشکیلاتی گزارشیگه کۉره، اوشبو زلزله عاقبتیده بیر مینگ ۹۹۲ کیشی هلاک بۉلگن، ینه اوچ مینگ ۶۳۱ کیشی جراحت آلگن.
شونینگدېک، بیرلشگن ملتلر تشکیلاتی معلوماتلریگه کۉره، زلزله نتیجهسیده سکّیز مینگ 300 دن آرتیق تورر جای اویلری ضرر کۉرگن یاکه بوتونلهی ویران بۉلگن.
