محلي منبعلر کنرده قیمتبها تاشلر کانیده کانچیلر اوستیگه تاش قولب توشیشی عاقبتیده بیر کانچی اۉلگن و ینه کیشی یرهلنگنینی خبر قیلدی.
منبعلرگه کۉره، حادثه بوگون اېرتهلب ساعت 7:00 اطرافیده (چهارشنبه، 8 دلو) چپهدره اولسواللیگینینگ «سوری غار» قیشلاغیده یوز بېرگن.
منبعنینگ قۉشیمچه قیلیشیچه، اوشبو حادثهده یرهلنگنلر دوالنیش اوچون محلي ساغلیقنی سقلش مرکزیگه یېتکزیلگن.
شو بیلن بیرگه، طالبلر نظارتیدهگی باختر اخبارات آژانسینینگ کنر بۉلیمی هم چپهدره اولسواللیگیده کانچیلر اوستیگه تاش قولب توشیشی عاقبتیده بیر کانچی هلاک بۉلگنی و ایکّی کیشی جراحتلنگنینی تصدیقلهگن.
قید اېتیلیشیچه، بوندن آلدین هم کنرده شونگه اۉخشش حادثهلرده بیر نېچته کانچیلر اۉلگن و یرهلنگن.
مذکور منطقهده بیروج، کونزیت و بلور کبی تورلی کانلر موجود.
آلدین هم اوشبو کانلرده شونگه اۉخشش حادثهلر یوز بېرگن و کانچیلر حیاتیگه ضامن بۉلگن.
متخصصلر بو کبی فاجعهلی حادثهلرگه کانلرنی خوفسیزلیک قاعدهلریگه رعایه قیلمسدن قزیب آلیش، شونینگدېک ایشچیلر اوچون حمایه واسطهلرینینگ یېتیشمسلیگینی اساسي سبب صفتیده کۉرستماقده.
افغانستانده یېر آستی بایلیکلری و کانلرنی قزیب آلیش طالبلر نظارتی آستیده کېنگ مقیاسده دوام اېتماقده.
ایتیلیشیچه، طالبلر کانلر آرقهلی اۉز مالی منبعلرینی تأمینلشگه اورینماقده، مخالفلر اېسه بونی افغانستان بایلیکلرینینگ تالان قیلیش دېب بهالهماقده.
