امریکا حکومتی اسرائیل و سعودیه عربستانیگه عمومي قیمتی۱۵ میلیارد دالردن آرتیق بۉلگن قورال-یراغ سوداسینی تصدیقلهدی.
فاکس نیوز خبریگه کۉره، راکت اوچیرگیچلر بیلن جهازلنگن۲۰ ته «آپاچی» جنگاور تیک اوچری،۳۲۵۰ ته یېنگیل تاکتیک حربي اوسکونههمده بیر نېچته کۉپ مقصدلی یېنگیل تیک اوچرلر اسرائیلگه ساتیلهدیگن حربي تخنیک ترکیبیگه کیرهدی. اوشبو معلوماتلرگه کۉره، اسرائیل جمعی۶.۶۷میلیارد دالرلیک قورال-یراغ قبول قیلیب آلهدی.
امریکا تشقی ایشلر وزیرلیگینینگ بیان قیلیشیچه، اوشبو سودا «اسرائیلنینگ چېگرهلرینی، مهم زیرساختلرینی و اهالی یشش مرکزلرینی حمایه قیلیش امکانیتلرینی یخشیلب، مملکتنینگ حاضرگی و کېلهجکدهگی تهدیدلرگه قرشی توریش امکانیتینی آشیرهدی»
بیاناتده شوندهی دېییلهدی: «امریکا قۉشمه ایالتلری اسرائیل خوفسیزلیگیگه صادق دیر و اسرائیلنینگ کوچلی همده تیار اۉزینی حمایه قیلیش امکانیتینی رواجلنتیریش و سقلب قالیشگه یاردم بېریش امریکانینگ ملي منفعتلری اوچون مهمدیر.»
امریکا قۉشمه ایالتلری شونینگدېک، سعودیه عربستانی ۹میلیارد دالر قیمتیده ۷۳۰ته «پاتریوت» راکتی و اونگه تېگیشلی جهازلرنی آلیشینی معلوم قیلدی. وزیرلیککه کۉره، بو قدم «فارس کۉرفزی منطقهسیده سیاسي برقرارلیک و اقتصادي ترقیاتده مهم رۉل اۉینهیدیگن ناتوگه اعضا بۉلمهگن اساسي اتفاقچینینگ خوفسیزلیگینی مستحکملش آرقهلی امریکا تشقی سیاستی و ملي خوفسیزلیک مقصدلرینی قۉللب-قوّتلهیدی.»
اوشبو قورال سوداسی امریکانینگ ایران بیلن کېسکینلشیب بارهیاتگن ترنگلیک شرایطیده عملگه آشیریلماقده.
امریکا جمهور باشلیغی دونالد ترامپ ایران هستوي قورالگه اېگه بۉلمسلیگی کېرهکلیگینی ایتگن. امریکا شونینگدېک، ایراننینگ راکت دستورینی جدّي تهدید دېب حسابلهیدی.
بونگه جوابن، ایران هستوي قورال ایشلب چیقیش نیتی یۉقلیگینی تأکیدلهگن، بیراق اۉزینینگ راکت صلاحیتی بۉییچه مذاکره آلیب بارمسلیگینی بیلدیرگن.
