امریکا اوردوسینینگ ایرانگه هجوم قیلیشگه تیارلیگی حقیدهگی خبرلر بیلن بیر وقتده، پولند باش وزیری دونالد توسک مملکتی وطنداشلرینی تېزلیک بیلن اېراننی ترک اېتیشگه چقیردی.
اسکاینیوزنینگخبریگه کۉره، پولند باش وزیری بوگون (پنجشنبه،۳۰ دلو) یقین بیر نېچه ساعت ایچیده پولند فقرالرینی ایراندن چیقیشی امکانی بۉلمسلیگی ممکنلیگینی ایتگن.
پولند باش وزیری، شونینگدېک، وطنداشلریدن هېچ قندهی شرایطده ایرانگه سفر قیلمسلیکنی سۉرهگن.
شو بیلن بیرگه، سیبیاس و سیانان اخبارات ترماقلری امریکا اوردوسی ایرانگه هجوم قیلیشگه، حتا شو دَم آلیش کونلریدهیاق، تیار اېکنینی خبر قیلگن.
اوشبو یېتکرمهلر معلوماتلریگه کۉره، امریکا جمهور رییسی دونالد ترامپ ایرانگه «هجوم قیلمسلیک» نینگ سیاسي و حربي عاقبتلری یوزهسیدن مصلحتچیلری و خوفسیزلیک رسمیلری بیلن منتظم روشده مصلحتلشیب بارماقده.
آق اوی مطبوعات سۉزلاوچیسی کارولین لیویت هم دونالد ترامپ ایران مسألهسی بۉییچه ملي خوفسیزلیک جماعهسی و باشقه شخصلر بیلن مصلحت قیلهیاتگنینی ایتگن.
اونینگ قۉشیمچه قیلیشیچه، جناب ترامپ بیر نېچه بار دیپلوماسی اېران یاکه باشقه دولتلرگه نسبتاً هر دایم اونینگ بیرینچی تنلاوی اېکنینی تأکیدلهگن.
امریکا اوردوسینینگ ایرانگه هجومگه تیارلیگی حقیدهگی خبرلر ایکّی دولت اۉرتهسیدهگی هستوي مذاکرهلرنینگ ایکّینچی باسقیچی ایکّی کون اوّل جنیواده بۉلیب اۉتگن بیر پیتده ترقهلدی.
اوشبو مذاکرهلر یکونیده ایران تشقی ایشلر وزیری عباس عراقچی تامانلر مذاکرهلر اوچون یۉنهلتیرووچی تمایللر بۉییچه کېلیشووگه اېریشگنینی و مذاکرهلرنی شو اساسده دوام اېتتیریشلرینی بیلدیرگن.
