امریکا و اسرایلنینگ ایران بیلن اوروشی بوگون (جمعه، ۱۵-حوت) یېتّینچی کونیگه کیردی. اۉتگن کېچه دوامیده امریکا و اسرایلنینگ ایران شهرلریگه هجوملری دوام اېتدی، شونینگدېک ایران هم اسرایلگه و منطقهدهگی امریکاگه تېگیشلی بازهلر همده مرکزلرگه هجوملرینی دوام اېتتیردی.
شو بیلن بیرگه، ایران تشقی ایشلر وزیری عباس عراقچی، انبیسی گه بېرگن صحبتیده ایران تامانیدن اۉت آچیشنی تۉختهتیش یاکه امریکا بیلن مذاکره قیلیش بۉییچه هېچ قندهی سۉراو بۉلمهگنینی ایتدی.
عراقچی شوندهی دېدی:«بیز نیمه اوچون امریکا بیلن مذاکره قیلیشیمیز کېرهک؟ اخیر بیز اولر بیلن ایکّی مرته مذاکره قیلدیک و هر سفر مذاکرهلر اۉرتهسیده بیزگه هجوم قیلیشدی»
اېران تشقی ایشلر وزیرینینگ قۉشیمچه قیلیشیچه، امریکا اېرانده تېز و آسان غلبهگه اېریشماقچی اېدی، اما اوروش باشلنگنیدن آلتی کون اۉتیب، اساسي مقصدیگه اېریشه آلمهگنی معلوم بۉلدی.
اونینگ ایتیشیچه، امریکا حاضر «ب رېجهسی» حقیده گپیرماقده، اما او بو رېجه «ینهده کتّه مغلوبیت» بۉلیشیگه ایشانهدی.
عراقچی منطقه دولتلریگه هجوم قیلیش حقیدهگی سوالگه جوابن شوندهی دېدی:
«بیز قۉشنیلریمیزگه هجوم قیلمهگنمیز. بیز مسلمان دولتلرگه هجوم قیلمهگنمیز. بیز نشانگه آلگن جایلر امریکانینگ نشانلری، بازهلری و انشااتلری بۉلیب، افسوسکی اولر بیزنینگ قۉشنی دولتلر حدودیده جایلشگن»
او ایران راکتلری و درونلرینینگ منطقهدهگی اَیریم مهمانخانهلر، قۉنالغهلر و تورر جای بنالریگه تېگیشینی اوروش نینگ «یان ضرری» دېب اتهدی و اساسي نشان امریکا کوچلری بۉلگن هر قندهی جای اېکنینی تأکیدلهدی.
اېران تشقی ایشلر وزیری، شونینگدېک، مملکتده ینگی رهبرنی تنلش جریانی دوام اېتهیاتگنینی، اما غیرعادي شرایط سبب بو جریان بیرآز وقت آلیشی ممکنلیگینی ایتدی. بو جریان علی خامنهای، ایران رهبری، اوروش نینگ دستلبکی هجوملریده هلاک بۉلگنیدن کېین باشلنگن.
امریکا و اسرایلنینگ ایران بیلن اوروشی جاري هفته شنبه کونی اېرتهلب باشلنگن. هجوملرنینگ بیرینچی تۉلقینیده خامنهای بیلن بیرگه اېراننینگ بیر قنچه یوقاری مرتبهلی عملدارلری هم هلاک بۉلگن.
بنیادی شهید ایشلری تشکیلاتینینگ معلوم قیلیشیچه، امریکا و اسرایل هجوملری نتیجهسیده حاضرگچه مینگدن آرتیق کیشی هلاک بۉلگن و آلتی مینگدن آرتیق کیشی جراحت آلگن.
اېراننینگ اسرایل و منطقهدهگی امریکا حربی مرکزلریگه قیلگن هجوملریده اېسه حاضرگچه بیر قنچه تینچ اهالی همده کمیده آلتی نفر امریکا عسکری هلاک بۉلگن.
