طالبلر تشقی ایشلر وزیری امیرخان متقی تیلفون آرقهلی بیرلشگن عرب امیرلیکلری تشقی ایشلر وزیری عبدالله بن زاید آل نهیان بیلن صحبتده، دنیس کویل اسملی امریکالیک محبوس نینگ آزاد اېتیلیشیده موفقیتلی واسطهچیلیک قیلگنی اوچون اوشبو دولتگه منّتدارچیلیک بیلدیرگن.
متفی اوشبو تیلفون صحبتیده طالباننینگ امریکا بیلن قالگن مسألهلرنی ایکّی تامانلهمه مناسبتلر آرقهلی حل قیلیشگه تیار اېکنینی هم بیلدیرگن.
طالبان تشقی ایشلر وزیرلیگینینگ یازیشیچه، بیرلشگن عرب امیرلیگی تشقی ایشلر وزیری طالبان و امریکا اۉرتهسیدهگی مناسبتلرنی «مهم» دېب بهالهگن.
اوشبو وزیرلیک بیاناتیگه کۉره، بیرلشگن عرب امیرلیگی تشقی ایشلر وزیری طالبان و امریکا اۉرتهسیدهگی علاقهلرنی یخشیلش یۉلیده ایجابي رۉل اۉینشنی دوام اېتتیریشگه تیارلیگینی بیلدیرگن.
طالبان اۉتگن هفته سهشنبه کونی دنیس کویل اسملی امریکا فقراسینی بیر ییل قماقده سقلهگنیدن سۉنگ آزاد قیلگن.
طالبان تشقی ایشلر وزیرلیگینینگ معلوم قیلیشیچه، دنیس کویل عایلهسی تامانیدن طالبان یېتکچیسی هبت الله آخوندزادهگه یوباریلگن مکتوب آرتیدن اوشبو گروه عالي محکمهسی اونی آزاد قیلیشگه قرار قیلگن.
وزیرلیک طالبان دنیس کویلنی «یخشی نیت بېلگیسی» صفتیده آزاد قیلگنینی ایتگن.
دنیس کویل امریکا تشقی ایشلر وزیرلیگی طالبان نظارتیدهگی افغانستاننی «ناقانوني حبسلرنی قۉللب-قوّتلاوچی دولتلر» رۉیخطیگه کیریتگنیدن کېین آزاد قیلینگن.
امریکا تشقی ایشلر وزیری مارکو روبیو طالبان تروریستیک اصوللردن فایدهلنهیاتگنینی و آدملرنی پول اوندیریش همده سیاسي امتیاز آلیش اوچون حبسگه آلهیاتگنینی ایتگن.
امریکانینگ ینه اَیریم رسميلری هم آگاهلنتیریب، اگر طالبان امریکا فقرالرینی آزاد قیلمسه، افغانستان کېینگی ونزوئلا و ایران بۉلیشی ممکنلیگینی بیلدیرگن.
