امریکا قوشمه ایالتلری و ایران اسلامی جمهوریتی، پاکستان واسطهچیلیگیده بۉلگن مذاکرهلر اساسیده، کېلهسی ایکّی هفته دوامیده اوروشلرنی تۉختهتیب، دایمی بیر تینچلیک اوچون سۉزلهشیشگه قرار قیلگن.
امریکا جمهور باشلیغی دونالد ترمپ و ایران اسلامی جمهوریتینینگ خوفسیزلیک کېنگشی اوشبو کېلیشوونی تصدیقلهگن.
ایران خوفسیزلیک کېنگشی تامانیدن بو حقده نشر اېتیلگن معلوماتگه کۉره، بو مملکت پاکستان آرقهلی ۱۰ بنددن عبارت، تینچلیک ریجهسینی امریکا تامانی بیلن شریک قیلگن.
ایران ریجهسیده، ایرانگه قرشی هجوملر بوتونلهی تۉختهتیلیشی، هرمز بۉغازی بوتونلهی ایران اختیاریده قۉییلیشی، امریکا حربیلری یقین شرق حدودلرینی ترک اېتیشی، ایرانگه باغلیق گروهلر جملهدن حزبالله بیلن بۉلگن اوروشلر تۉختهتیلیشی، ایرانگه هجوم بۉلمسلیگی اوچون کفالت بېریلیشی، ایرانگه نسبتن قۉییلگن تحریملر بیکار قیلینیشی، ایراننینگ موزلهتیلگن سرمایهلری آزاد اېتیلیشی و ایران اورانیومنی باییتیشی دوام اېتیشی مسالهلری کېلتیریلگن.
ایتیلیشیچه، ایران و امریکا وکیللری کېلهسی ایکّی هفته دوامیده پاکستانده اوچرهشوو اۉتکزیب، بو مسالهلرنی محاکمه قیلهدی.
امریکا و ایران آلتی هفتهلیک اوروشدن کېین آتیش-کېسینگه تَن بېرماقده دیر. امریکا و اسراییلنینگ ایرانگه قرشی قوشمه هجوملری بیلن باشلنگن اوشبو اوروش، نه فقط ایران بلکه یقین شرق حدودیده کینگ ناتینچیلیکلرنی اۉرتهگه آلیب کېلدی.
