عامهوي اخبارات واسطهلرینینگ خلقارا خبرلریگه کۉره، لبنانلیک ژورنالیست «آمال خلیل» اسرایلنینگ مملکت جَنوبیگه اویوشتیرگن هجوملری عاقبتیده هلاک بۉلگن، اونینگ همکسبی، فوتوگراف زینب فرج اېسه یرهلنگن.
رویترز خبریگه کۉره، اوشبو هجوم تیناوون (چهارشنبه، 2ثور) لبنان جَنوبیدهگی الطیری شهری یقینیده صادر بۉلگن.
خبرده ایتیلیشیچه، ایکّی ژورنالیست الطیری یقینیدهگی واقعهلرنی یاریتهیاتگن پیتده، اسرایل اولرنینگ آلدیده بۉلگن بیر ترانسپورت واسطهسیگه ضربه بېرگن.
رویترز لبنان ساغلیقنی سقلش وزیرلیگیگه تهیهنیب یازیشیچه، اولر کېین یقین اطرافدهگی بیر اوی تامان یوگوریشگن، اما بو اوی هم اسرایل هجومیگه اوچرهگن.
لبنان ژورنالیستلر اویوشمهسینینگ معلوم قیلیشیچه، قوتقرووچیلر باشیدن جراحت آلگن زینب فرجنی قوتقریشگه موفق بۉلگن، بیراق «آمال خلیل» اوشبو هجومده هلاک بۉلگن.
لبنان رسميلری، شونینگدېک، اسرایل نارنجک آتیب، تېز یاردم موترلرینینگ ضررلنگن بناگه یېتیب باریشینی تۉسیب قۉیگنینی و شو آرقهلی یاردم کۉرسهتیشگه تۉسقینلیک قیلگنینی بیلدیرگن.
اسرایل اوردوسی حاضرچه بو ژورنالیستنینگ اۉلیمی یوزهسیدن ایضاح بېرمهگن.
لبنان باش وزیری نواف سَلام ژورنالیستلرنی نشانگه آلیش و قوتقروو ایشلریگه تۉسقینلیک قیلیشنی «حربي جنایت» دېب اتهب، لبنان بو جنایتلرنی خلقارا تشکیلاتلرده تعقیب قیلیش اوچون برچه چارهلرنی کۉریشینی ایتگن.
مذکور ژورنالیست اسرایل و لبنان اۉرتهسیده جاري ییلنینگ۱۶ آییدن باشلب اۉن کونلیک اۉت آچیشنی تۉختهتیش اعلان قیلینگن و بوگون واشنگتنده تینچلیک مذاکرهلرینینگ ایکّینچی باسقیچی اۉتکزیلیشی کوتیلهیاتگن بیر پیتده هلاک بۉلگن.
