ایران تشقی ایشلر وزیری عباس عراقچی حقیدهگی ایرنا خبریگه کۉره، او عمان سفرینی یکونلهگچ و روسيهگه یۉل آلیشدن آلدین پاکستانگه قَیتیب بارهدی همده ینه پاکستانلیک رسميلر بیلن اوچرهشوو اۉتکزهدی.
اېران تشقی ایشلر وزیری تیناوون کېچقورون پاکستان باش وزیری و اوردو قوماندانی بیلن اوچرهشوودن سۉنگ اسلام آبادنی ترک اېتیب، مسقطگه یۉل آلگن اېدی.
ایرنا شونینگدېک خبر قیلیشیچه، عراقچی باشچیلیک قیلگن هیئتدهگی اَیریم اعضالر «اوروشنی یکونلش بیلن باغلیق مسألهلر بۉییچه مصلحتلشوو و کۉرسهتمهلر آلیش» اوچون تهرانگه قَیتگن و یکشنبه کونی کېچقورون ینه اسلام آبادگه قَیتیب، عراقچیگه قۉشیلیشهدی.
بو آرهده دونالد ترامپ عراقچینینگ اسلام آباددن عمان تامان یۉل آلگنیدن سۉنگ، امریکا نینگ اۉرته شرق اوچون مخصوص نمایندهسی استیو ویتکاف و کیاوی جرد کوشنرنینگ پاکستانگه سفرینی بېکار قیلگنینی معلوم قیلگن.
ترامپ امریکا «برچه کارتلرنی قۉلیده اوشلب تورگنینی» و ایران ایستهگن پیتده مذاکره اوچون مراجعت قیلیشی ممکنلیگینی، بیراق اقش وکیللری۱۸ ساعت اوچیب باریب پاکستانده «هېچ نرسه» حقیده مذاکره اۉتکزمسلیگینی ایتگن.
عراقچینینگ پاکستانگه سفری آرتیدن امریکا هیئتینینگ تشریفی بېکار قیلینگن بۉلسه-ده، پاکستانلیک رسميلر تامانلر اۉرتهسیدهگی مذاکرهلرنی یېنگیللشتیریش اوچون واسطهچیلیک حرکتلرینی دوام اېتتیریشلرینی بیلدیرگن.
