پاکستان ایچکی ایشلر وزیری محسن نقوی بیر هفته ایچیده ایکّینچی بار تهرانگه بارگن بیر پیتده، بوگون پنجشنبه، ۳۱-ثور پاکستاننینگ اردوسی قوماندانی عاصم منیرنینگ هم ایرانگه سفر قیلیشی رېجهلشتیریلگنی ایتیلهدی.
ایران عاموی اخبارات واسطهلری خبریگه کۉره، پاکستان اوردوسی قوماندانینینگ بو سفری تهران و واشنگتن اۉرتهسیدهگی واسطهچیلیک مذاکرهلرینی دوام اېتتیریش مقصدیده عملگه آشیریلماقده.
ایسنا خبرگزارلیگینینگ گزارش بېریشیچه، «پاکستان اردوسی قوماندانی فیلد مارشال عاصم منیر، تهران رسميلری بیلن مذاکرهلر و مصلحتلشوولرنی دوام اېتتیریش همده تهران و واشنگتن اۉرتهسیدهگی واسطهچیلیک دایرهسیده بوگون تهرانگه سفر قیلهدی.»
تیناوون محسن نقوی هم جاري هفته ایچیده ایکّینچی بار تهرانگه بارگن اېدی.
او سفر دوامیده ایران جمهور رییسی مسعود پزشکیان و بو مملکت ایچکی ایشلر وزیری اسکندر مؤمنی بیلن اوچرهشیب، مذاکرهلر اۉتکزگن.
ایران یېتکرمهلریگه کۉره، نقوی پاکستان رسميلرینینگ «مذاکرهلرنی دوام اېتتیریش مهملیگی» حقیدهگی خبرلرینی ایرانگه یېتکزگن.
عاصم منیر اۉتگن آی هم، ۲۸حمل کونی ایرانگه سفر قیلیب، تهران و واشنگتن اۉرتهسیده واسطهچی رۉلینی بجریشگه اورینگن اېدی.
عمان واسطهچیلیگی موفقیتسیز توگهب، امریکا قۉشمه ایالتلری و اسرایل بیلن ایران اۉرتهسیده آلتی هفتهلیک ماجرا باشلنگچ، پاکستان واسطهچی و مذاکرهلر مېزبانی صفتیده جریانگه کیرگن.
پاکستان باش وزیری شهباز شریف مېزبانلیگیده اسلام آبادده اۉتگن امریکا و ایران هیئتلری اۉرتهسیدهگی تۉغریدن-تۉغری مذاکرهلر موفقیتسیز یکونلنگچ، عاصم منیر و محسن نقوی بو جریانده فعالراق قتنهشیب، واشنگتن و تهران اۉرتهسیده پیام المشماقده.
