پاکستان باش وزیری شهباز شریف، افغانستاندهگی طالبان رژیمی هندوستاننینگ پاکستانگه قرشی آلیب بارهیاتگن نیابتی اوروشینی یېنگیللشتیرهیاتگنینی ایتدی.
او بوگون (پنجشنبه، 7 جوزا) پاکستان نینگ هستوي قورالگه اېگه بۉلگن کونی مناسبتی بیلن یۉلهگن پیامیده هند نامینی تیلگه آلمهسدن، «دشمن» تۉغریدن-تۉغری جنگده مغلوب بۉلگچ، باشقه اصوللر آرقهلی پاکستان خوفسیزلیگیگه ضرر یېتکزیشگه اورینهیاتگنینی ایتدی.
شریف هندوستاننی «فتنه خوارج» و «فتنه هندوستان» کبی قۉزغهتیلگن عامللردن فایدهلنیشده عیبلب، افغانستاندهگی طالبان رژیمی بو بارهده همکار و یېنگیللشتیرووچی رۉل اۉینهیاتگنینی تأکیدلهدی. او شوندهی دېدی: «بیز بو فتنهنی ایلدیزی بیلن یۉق قیلیشگه قطعي بېل باغلگنمیز.»
پاکستان حکومتی «تحریک-طالبان پاکستان»نی (تیتیپی) «فتنه خوارج»، «بلوچستان آزادلیک اوردوسی»نی اېسه «فتنه هندستان» دېب اتهیدی.
جناب شریفنینگ قۉشیمچه قیلیب، پاکستان هېچ بیر دولتگه قرشی تجاوز قیلیش نیتیده اېمسلیگینی، اما اۉزینی حمایه قیلیش حقوقینی تۉلیق سقلب قالیشینی ایتدی.
پاکستان اۉتگن ییلی بیر مرته هندستان بیلن و بیر نېچه باسقیچده افغانستان طالبانی بیلن حربي تۉقنهشوولرگه کیریشگن اېدی.
شهباز شریف، باش وزیر و آصف علی زرداري، پاکستان جمهور رییسی « یوم تکبیر» یاکه مملکت نینگ هستوي قورالگه اېگه بۉلگن کونینی پاکستان تاریخیدهگی تقدیري لحظه دېب اتشدی.
اولر پاکستان 1998-ییل 28-می کونی ایلک هستوي قورالنی موفقیتلی سیناودن اۉتکزگچ، دنیانینگ یېتّینچی هستوي دولتی بۉلگنینی و اۉزی نینگ تيیب توریش صلاحیتینی مستحکملهگنینی ایتیشدی.
هندستان و پاکستان اۉتگن ییلگی ماجرا چاغیده بیر-بیرینی هستوي قورالدن فایدهلنیش بیلن هم تهدید قیلگن اېدی.
