امریکا قۉشمه ایالتلری مالیه وزیرلیگی یقینده ایران تامانیدن تشکیل اېتیلگن «فارس کۉرفزی سوو یۉللرینی باشقریش تشکیلاتی»نی چېکلاولر رۉیخطیگه کیریتدی.
وزیرلیک چهارشنبه کونی (6 جوزا) اعلان قیلگن بیاناتیده اوشبو تشکیلات نینگ توزیلیشینی «اسلامي انقلاب قۉریقچیلری کارپوسی (سپاه پاسداران) نینگ هرمز بۉغازیدن اۉتووچی کېمهلردن تاولمچیلیک قیلیش و درآمد آلیشگه اورینیشلری» دېب اتهدی.
امریکا مالیه وزیری اسکات بسنت شوندهی دېدی: «ایران نینگ گلوبل دېنگیز سوداسیدن تاولمچیلیک قیلیشگه قرهتیلگن سۉنگگی اورینیشی اقتصادي غضب سیاستی رژیمنی مالیوي جهتدن قتّيق باسیم آستیده قالدیرگنینی کۉرسهتهدی.»
ایران هرمز بۉغازینی یاپگنی و امریکا تامانیدن دېنگیز قملی جاري اېتیلگنیدن سۉنگ، تخمیناً اوچ هفته آلدین فارس کۉرفزی سوو یۉللرینی باشقریش تشکیلاتینی تشکیل قیلگن اېدی.
بو تشکیلات نینگ اساسي وظیفهسی «هرمز بۉغازیدن اۉتووچی کېمهلر حرکتینی نظارت قیلیش و موافقلشتیریش» دېب بېلگیلنگن.
ایران برچه کېمهلر هرمز بۉغازیدن اۉتیشدن آلدین فارس کۉرفزی سوو یۉللرینی باشقریش تشکیلاتی بیلن موافقلشیشی کېرهکلیگینی معلوم قیلگن.
تشکیلات فعالیتی حدودی «بۉغاز شرقیده ایراندهگی مبارک تاغی و امارت نینگ فجیره جَنوبی آرهسیدهگی چیزیق»دن تارتیب، «بۉغاز غربیده اېراندهگی قشم آرالی نینگ آخری و امارت نینگ امالقیوین حدودی آرهسیدهگی چیزیق»گچه بېلگیلنگن.
اما اقش مالیه وزیرلیگی بو تشکیلات موافقلشتیریش اوچون اېمس، بلکه کېمهلردن تاولمچیلیک قیلیش آرقهلی سپاه نینگ قوراللی مقصدلری اوچون مالیوي منبع یرهتیش مقصدیده تشکیل اېتیلگنینی اَیتماقده.
امریکا مالیه وزیرلیگی «اوشبو تشکیلات بیلن همکارلیک قیلهدیگن برچه شخصلر»نی هم چېکلاولر رۉیخطیگه کیریتگنینی بیلدیردی.
