جهان ساغلیقنی سقلش تشکیلاتی کانگو دموکراتیک جمهوریتیده ابولا ویروسیگه چهلینگن تۉرت نفر بېمار ساغهیگنینی معلوم قیلدی.
اوشبو بېمارلرنینگ ساغهیگنی یکشنبه کونی (۱۰-جوزا) جهان ساغلیقنی سقلش تشکیلاتی باشلیغی تدروس آدهانوم اشتراکیده نشانلندی.
جهان ساغلیقنی سقلش تشکلاتی بیاناتیگه کۉره، ساغهیگنلر ایتوری ولایتی نینگ بونیا شهریده ابولا ویروسینی یوقتیرگن تۉرت نفر نرسلر بۉلگن.
تشکیلات نینگ بیلدیریشیچه، اولر بونیا شهریده ابولا بیلن کسللنگن و کسللیک نینگ اېرته انیقلنیشی طفیلی اوشبو اۉلیمگه آلیب کېلووچی خستهلیکدن امان قالگن ایلک بېمارلردیر.
جهان ساغلیقنی سقلش رهبری کانگو دموکراتیک جمهوریتیگه سفری دوامیده حکومت وکیللری و قبیله یېتکچیلری بیلن اوچرهشگن.
او ایکس اجتماعي ترماغیده یازیشیچه، ینگی ابولا تشخص و دوالش مرکزی نینگ کلیتلرینی محلي مأموریتگه تاپشیرگن همده اهالینی کسللیکنی اېرته انیقلش و دوالنیش اوچون طبي مؤسسهلرگه اۉز وقتیده مراجعت قیلیشگه چقیرگن.
بیر آیدن آرتیق دوام اېتهیاتگن ابولا کسللیگی نینگ ینگی تۉلقینیده حاضرگچه اتیگی بېش نفر بېمار ساغهیگن.
کنگو و اوگاندا ابولا کسللیگی اېنگ کۉپ ترقهلگن مملکتلر حسابلنهدی. حاضرگچه هر ایکّی مملکتده بیر مینگ ۱۰۰دن آرتیق گمانلی حالت، ۲۶۳ ته تصدیقلنگن حالت قید اېتیلگن و ۴۳ کیشی وفات اېتگن.
