امریکا قۉشمه ایالتلری جمهور رییسی دونالد ترامپ ایچکی تنقیدچیلریگه مراجعت قیلیب، اولرنینگ سلبي بیاناتلری ایران بیلن مذاکرهلر آلیب باریشنی قیینلشتیرهیاتگنینی ایتدی.
ترامپ بوگون (دوشنبه، 11-جوزا) تروثسوشیال ترماغیده ایران حقیقتاً هم کېلیشووگه اېریشیشنی ایستهیاتگنینی و آخر-عاقبت همهسی یخشی یکونلنیشینی یازدی.
اونینگ تأکیدلشیچه، ابران بیلن توزیلهدیگن کېلیشوو امریکا و اونینگ اتفاقچیلری منفعتلریگه ماس کېلهدی.
امریکا جمهور رییسی ایچکی سیاسي تنقیدچیلرینی کېسکین تنقید قیلیب، اولر نینگ «سلبي ایضاحلری» مذاکره جریانینی مرکّبلشتیرهیاتگنینی بیلدیردی.
ترامپ شوندهی یازگن: «دموکراتلر و اۉزینی وطنپرور دېب بیلمهیدیگن اَیریم جمهوریتچیلر توشونمهیپتیمی؟ سیاسي رهبرلر مثلی کۉریلمهگن درجهده دایمي روشده سلبي بیاناتلر بېریب، مېن تېزراق حرکت قیلیشیم، سېکینراق حرکت قیلیشیم، اوروش باشلشیم یاکه اوروشدن تيیلیشیم کېرهکلیگینی تکرارلهیوېریشسه، وظیفهمنی بجریش و مذاکره آلیب باریش انچه قیینلشهدی.»
او خبری نینگ یکونیده: «شونچهکه اۉتیرینگ و خاطرجمع بۉلینگ، آخریده همهسی یخشی توگهیدی»، دېب یازگن.
دموکرات سیاستچیلر و اَیریم جمهوریتچیلر امریکا نینگ ایران بیلن اوروشگه تارتیلیش احتمالینی تنقید قیلیب کېلماقده. دموکراتلر حربي یېچیم برقرار اېمسلیگی و امریکا اوزاق دوام اېتهدیگن ماجراگه کیریب قالیشی ممکنلیگینی تأکیدلب، ترامپ نینگ حربي صلاحیتلرینی چېکلشگه قرهتیلگن قانون لایحهسینی کانگرس محاکمهسیگه هم آلیب چیققن، بیراق او قبول قیلینمهگن.
امریکا و ایران قریب آلتی هفتهلیک اوروشدن سۉنگ مذاکرهلرگه کیریشگن. ایکّی دولت اۉرتهسیدهگی مذاکرهلر پاکستان واسطهچیلیگیده تخمیناً ایکّی آیدن بویان دوام اېتماقده.
سۉنگّی معلوماتلرگه کۉره، دونالد ترامپ کېلیشوو لایحهسیگه ینه-ده قطعيراق اۉزگرتیریشلر کیریتیلیشینی طلب قیلماقده. امریکا تکلیف قیلهیاتگن یکوني حجت اېران رهبریتیگه قچان یېتکزیلیشی و اونگه قندهی جواب بېریلیشی حاضرچه نامعلوم.
بو جریانده سپاه بیلن سنتکام اۉرتهسیده ترقاق تۉقنشوولرهم دوام اېتماقده
سۉنگگی واقعهلرده سنتکام ایران جَنوبیدهگی سِریک و قېشم حدودلریدهگی حربي اۉبژېکتلرگه ضربه بېرگنینی تصدیقلهگن بۉلسه، بوگون اېرتهلب ایران تامانی امریکا نینگ کویتدهگی حربي بازهسیگه هجوم اویوشتیریلگنی حقیده خبر بېردی.
