طالبلرنینگ تشقی ایشلر وزیرلیگی ایراندن افغانستانگه ۱۶۵کیشی محبوس کۉچیریلگنینی معلوم قیلدی. اولر آرهسیده اۉلیم جزاسیگه حکم قیلینگن بیر عیال و سکّیز اېرکک هم بار.
وزیرلیک بوگون (جمعه،۲۲ جوزا) اعلان قیلگن بیاناتیده اوشبو محبوسلر شخصی تصدیقلنیب، برچه حقوقي جریانلر یکونلنگچ مملکتگه آلیب کېلینگنینی بیلدیردی.
طالبان تشقی ایشلر وزیرلیگی معلوماتیگه کۉره،۱۶۵ محبوس آرهسیده ایران محکمهلری تامانیدن اۉلیم جزاسیگه حکم قیلینگن بیر عیال و سکّیز اېرکک هم موجود.
بیاناتده ایتیلیشیچه، «اوشبو شخصلر تشقی ایشلر وزیرلیگی همده افغانستان اسلام امیرلیگی نینگ تهراندهگی اېلچیخانهسی سعی-حرکتلری نتیجهسیده اۉلیم جزاسیدن عفو اېتیلیب، اوزاق مدتلی قماق جزاسیگه حکم قیلینگن.»
وزیرلیک نینگ تأکیدلشیچه، محبوسلرنی اۉتکزیش بۉییچه ۱۱-دوره نینگ ایکّینچی باسقیچیده افغانستانده قماق جزاسینی اۉتهیاتگن بیر نفر ایرانلیک عیال هم ایرانگه تاپشیریلگن.
محبوسلرنی ایراندن افغانستانگه اۉتکزیش جریانی ۲۰۱۹-ییلده باشلنگن، بیراق طالبان حاکمیتگه قَیتگچ، بو جریان ینهده جدللشگن.
ایکّی تامان اۉرتهسیدهگی رسمي کېلیشووگه موافق، ایران و افغانستان اۉرتهسیده اۉتکزیلگن محبوسلر جزانینگ قالگن مدتینی اۉز مملکتلریده اۉتشلری کېرهک.
طالبان سۉنگگی تۉرت ییل دوامیده محبوسلرنی اۉتکزیش بۉییچه بیر نېچه باسقیچلرنی باشقرگن، بیراق ایران محکمهلری تامانیدن چیقریلگن حکملرنینگ افغانستان ایچیده عیناً قندهی اجرا اېتیلگنی حقیده حاضرچه معلومات بېرمهگن.
