افغانستان ملی اسلامی جنبش حزبینینگ اعضالریدن بۉلمیش و ایلگری بو حزب سۉزلاوچیسینینگ اۉرین باسری اولهراق فعالیت قیلیب کېلگن بحرالدین جوزجانی، بیر نیچه هفتهدن بېری بیدرک یۉقالگن.
ایتیلیشیچه، جوزجانی طالبان چقیرووی اساسیده ایراندن افغانستان کېلگنیدن سۉنگ اۉتگن قربان هییتینینگ ایکّینچی کونی یۉقالگن و حاضرگچه اونینگ تقدیری حقیده هیچ قندهی بېلگی یۉق دیر.
جنبش حزبی حاضرگچه بو واقعه یوزهسیدن فکر بیلدیرمهگن و اوشبو اعضاسی تقدیری حقیده همان سکوتنی سقلب کېلماقده دیر.
بحرالدین جوزجانیگه یقین بیر نېچه منبعلر، اۉزبېک تیوی بیلن بۉلگن علیحده صحبتلریده و شریک قیلگن معلوماتلریده، بو کیشی بیلن هیچ قندهی علاقه قورالمهگنلرینی ایتهدی.
شونینگدېک، بو منبعلرنینگ ایتیشیچه، حاضرگچه جوزجانینینگ تقدیری بېللی بۉلمهگنی اونینگ عایلهسینی چوقور تشویشده سالیب قۉیگن.
منبعلردن ایریملرینینگ ادعالریگه کۉره، جوزجانی طالباننینگ استخباراتی تامانیدن اوشلنیب، یۉقالگن.
طالبان هم اېسه حاضرگچه بو خصوصده هیچ قندهی فکر بیلدیرگن اېمس.
بو شوندهی بیرحالده دیر که طالبان حاکمیتی دوریده، جنبش حزبینینگ بیر قنچه اعضالری و سابق حربیلری حبسگه آلینگن و ایریملری هم طالبان تامانیدن اۉلدیریلگن.
