طالبلرتشقی ایشلر وزیرلیگی افغانستان و مرکزي آسیا تدقیقات مرکزلرینینگ قۉشمه ییغیلیشی اېرتهگه (سهشنبه، 26 جوزا) کابلده بۉلیب اۉتیشینی معلوم قیلدی.
حاضرده طالبلر نظارتی آستیده فعالیت یوریتهیاتگن افغانستان ملي تلویزیونینینگ خبر بېریشیچه، اوشبو ییغیلیش طالبان تشقی ایشلر وزیرلیگینینگ استراتژیک تدقیقاتلر مرکزی مېزبانلیگیده تشکیل اېتیلهدی.
مذکور تلویزیوننینگ معلوماتیگه کۉره، ییغیلیشده مرکزي آسیا دولتلری و آذربایجان نینگ یېتکچی تدقیقات مرکزلری وکیللری اشتراک اېتیشی رېجهلشتیریلگن.
طالبان تشقی ایشلر وزیرلیگینینگ معلوم قیلیشیچه، انجمنده منطقوي باغلیقلیک، برقرارلیک، تجارت، انرژی، ترانزیت و اقتصادي همکارلیک کبی مهم مسألهلر یوزهسیدن کېنگ قمراولی محاکمهلر اۉتکزیلهدی. شونینگدېک، افغانستان و مرکزي آسیا دولتلری اۉرتهسیدهگی عملدهگی همکارلیک حالتی هم کۉریب چیقیلهدی.
طالبان افغانستانده حاکمیتنی قَیته اېگهلهگنیدن بویان مرکزي آسیا مملکتلری بیلن سیاسي و اقتصادي علاقهلرنی کېنگهیتیریشگه علیحده اعتبار قرهتیب کېلماقده. سۉنگی ییللرده تجارت، ترانسپورت، انرژی و ترانزیت ساحهلریدهگی همکارلیکنی رواجلنتیریش بۉییچه قطار اوچرهشوولر و کېلیشوولر عملگه آشیریلگن.
بوندن تشقری، طالبان آذربایجان بیلن هم مناسبتلرنی کېنگهیتیریشگه اینتیلماقده. تامانلر اۉرتهسیده سیاسي ملاقاتلر، اقتصادي همکارلیک و منطقوي لایحهلرده اشتراک اېتیش مسألهلری بۉییچه علاقهلر فعاللشیب بارماقده.
