افغانستانده جنسیت و قومی قرهش اساسیدهگی تعصبنینگ قربانی بۉلگن قیزلردن بیری موریچاقلیک صدیقه ناملی تورکمن قیز.
واقعه بېش ییل آلدین، بادغیس ولایتی موریچاق قیشلاغینینگ تورکمن یشاوچیسی رجب ناملی شخص، قرضدارلیگیدن سۉنگ باشلنهدی. طالبان بیلن یقین علاقهده بۉلگن و پشتون خلقیگه منسوب بالامرغاب قوم بویوکلریدن بۉلمیش «خداینظر» ناملی شخص، رجبدن قرض عوضیگه ۱۲ یاشر قیزینینگ قۉلینی سۉرهیدی. بو طلبگه قرشی تورگن ۱۲ یاشر صدیقه زندان اېتیلیش بیلن تهدید اېتیلهدی و نهایت خداینظرنینگ طالبان ادارهلریدهگی نفوذی و طالباننینگ پشتونگه اوستونلیک بېریب، تورکمنگه قرشی تعصب قیلگنی سبب، ۱۲ یاشر صدیقه قماققه تارتیلهدی و شوندن سۉنگ اونینگ تقدیری قماق و محکمهده اۉتهدی.
صدیقهنینگ آنهسی قربانگل قیزیگه نسبتن ظلمدن تۉییب کېتگنیدن سۉنگ، ویدیو بیانات ترقهتیب، انسان حقلری فعاللریدن سېسیگه قولاق توتیب، عدالت اوچون او بیلن بیرگه بۉلیشلرینی سۉرهیدی.
صدیقهنینگ عایلهسی بو قیزنی قماق و ظلمدن قوتقریش اوچون طالباننینگ کۉپلب ادارهلری جملهدن بو گروه محکمه، امر باالمعروف و نهی عن المنکر وزیرلیگی و حتا که قندهارده طالبان رهبرینینگ ادارهسیگچه عدالت سۉرهب بارهدی. بیراق همه اېشیکلر بو عایله قرشیسیده فقط تورکمن و عیال بۉلگنی و قضیهنینگ تامانی پشتون همده اېرکک بۉلگنی سبب یاپیلهدی.
شو بیلن، ۱۲ یاشلی صدیقه تقدیری قماققه تامان تارتیلیب، عمرینینگ اینگ یخشی دوری بۉلمیش ۱۲ یاشلیکدن ۱۷ یاشلیکگچهنی قماق و ظلم قیغوسی بیلن اۉتهدی و بو ظلم همان دوام اېتماقده دیر.
صدیقه اوچون عدالت سۉرهش قان توکیلیشیگه هم سبب بۉلگن
صدیقهنینگ قضیهسی باشلنگنیدن سۉنگ، اونگه عدالت تامینلنیشی اوچون قیشلاقداشی «ارباب حامد» ناملی شخص میدانگه چیقهدی. بیراق بو کیشی هم بیر نیچه وقتدن سۉنگ قویاش ۱۴۰۲ – ییل، سهشنبه کونی ۲۶ – جدی، هرات شهریده، ناتانیش قوراللی شخصلر دېب تانیشتیریلگن آدملر آرقهلی اۉققه توتیلیب، اۉلدیریلهدی.
منبعلرنینگ ایتیشیچه، ارباب حامدنینگ ترور اېتیلیشی هم صدیقه واقعهسیگه باغلیق و ایریم تامانلر اونینگ بو واقعه خصوصیده سېسنی اوچیریش مقصدیده، بو کیشینی ظالمانه و سِرلی طرزده ترور قیلگن.
طالبان رهبری ادارهسیگچه کېنگهینگن عدالتسیزلیک و تعصب
صدیقه ناملی تورکمن قیزنینگ قضیهسیدن اۉزبېک تیوی گه یوباریلگن مکتوبلرده، بو قضیه حتا که طالبان رهبری هبتالله آخوندزاده ادارهسیگچه هم یېتیب بارگن. بیراق بو قضیه بو یېرده هم عدالتسیزلیک بیلن دوچ کېلگن.
منبعلرنینگ اۉزبېک تیوی بیلن شریک قیلگن معلوماتیگه کۉره، طالباننینگ محکمهسی خداینظر تاثیری سبب بو قیز قماققه تارتیلیشی اوچون قرار قیلگن بیراق اېرتهگه بو قضیه آچیقلنیب ملامتلیکدن اۉزلرینی قاچیریش اوچون قرار خصوصیده هیچ قندهی یازوولی حجت ترقهتمهگن و فقط تیل بیلن بو قیز قماققه تارتیلسین دېب بویروغ بېرگن.
قماق یا مجبوری نکاح؛ صدیقه آلدیده قۉییلگن ایکّی تَنلاو
منبعلرنینگ اۉزبېک تیوی گه یوبارگن معلوماتلریگه کۉره، طالبان و بو گروه بیلن یقین علاقهسی بۉلگن خداینظر ناملی شخص، قیزی یاشیده بۉلگن صدیقه آلدیده ایکّی تَنلاو قۉیگن: «یا خداینظرگه تورموشگه چیقیشگه راضی بۉلهسن یا زندان اېتیلهسن»
صدیقه، آتهسی یاشیده بۉلگن انسان بیلن تورموشگه چیقیشنی قبول قیلمهگنی سبب، زندان تامان یۉل آلگن و بو قیز تورکمن بۉلگن سبب، عدالت اېشیکلری اونینگ برابریده یاپیلگن همده اونینگ انسانی طلبی، بیر پشتون اېرککنینگ هوسبازلیک طلبلری سایهسیده اعتبارسیز قالدیریلگن.
حاضر صدیقه قماقخانهده سقلنیب کېلماقده و منبعلرنینگ ایتیشیچه اونینگ ساغلیق احوالی هم آغیر دیر. طالبان عدلی و قضایی ادارهلری بو قیزگه تورکمن و عیال بۉلگنی اوچون ظلمنی قبول قیلر اېکن، بو قیز و عایلهسی اینیقسه قیزی قیغوسیدن غم گلیمیده اۉلتیرگن آنهسی آزاد و انسانی تفکرگه اېگه بۉلگن انسانلردن اولر بیلن بیرگه بۉلیشلرینی سۉرهشماقده.
