تورکیه کېلهسی ایکّی کون دوامیده، ناتو تشکیلاتیگه اعضا مملکتلرنینگ رهبرلری ییغینیگه میزبانلیک قیلهدی.
رویترز خبریگه کۉره، اوشبو ییغین، امریکا قۉشمه ایالتلری جمهور باشلیغی دونالد ترامپنینگ اروپا مملکتلریدن ایرانگه قرشی اوروشده اۉزلریگه اختیار قیلگن سیاستلری و ناتو تشکیلاتی مدافعه بودجهسی اروپالیک مملکتلر و کانادانینگ حصهسی آزلیگیدن بۉلگن تنقیدلری سایهسیده اۉتکزیلماقده دیر.
دېیرلی، بو ییغینده اروپا مملکتلری مدافعه هزینهلرینی کۉپهیتیریب، بو خصوصده کۉپراق بودجهنی اختصاصلشتیریشلری مسالهسی کۉریب چیقیلیشی ممکن دیر.
رویترز بو حقده نشر قیلگن بیاناتیده، بو مرته ناتو تشکیلاتی اعضالری شوندهی بیرحالده ییغین اۉتکزماقده دیر که ترامپنینگ ناتو اعضالریدن بۉلگن تنقیدی سبب، بو تشکیلات اعضالری اۉرتهسیده ایشانچسیزلیکلر کۉپهیگن.
شوندهی بۉلسه هم، بو دور ییغینده ناتو خوفسیزلیک تشکیلاتی ۳۲ اعضاسی رهبرلری اشتراک اېتیشی کوتیلهدی.
بوندن تشقری، ییغین دایرهسیده اوکراین جمهور باشلیغی ولادیمیر زلنسکی، جنوبی کوریا جمهور باشلیغی لی جائه میونگ، اروپا کېنگشی باشلیغی آنتونیو کوستا و اروپا کمیسیوننینگ باشلیغی اورزلا فون درلاین هم اشتراک اېتیشی معلوم قیلینگن.
بوندن تشقری، ناتو تشکیلاتی اعضالری رهبرلری اینیقسه تورکیه جمهور باشلیغی رجب طیب اردوغان و امریکا جمهور باشلیغی دونالد ترامپ اۉرتهسیده علیحده اوچرهشوولر بۉلیب اوتیشی هم رېجهلشتیریلگن.
دېمک، بو دور ناتو تشکیلاتی ییغینیده، اوشبو تشکیلات اعضالرینینگ مدافعه بودجهلری، اعضا مملکتلرنینگ مدافعه و حربی صناعتی و بو خصوصدهگی همکارلیکلر، اوکراین اوروشی و روسیهگه قرشی بو مملکتنینگ قۉللب-قۉتلنیشی و شونگه اۉخشش ایران اوروشی و هرمز بۉغازی احوالیگه عاید مسالهلر بحث اېتیلیشی کوتیلهدی.
