طالبلرنینگ بدخشان ولایتی امنیه قوماندانلیگی فیض آباد شهریده یشاوچی اېر-خاتین ایکّی چقهلاقنی اۉغیرلشده عیبلنیب قۉلگه آلینگنینی معلوم قیلدی.
طالبلرنینگ بدهخشاندهگی امنیه قوماندانلیگی مطبوعات سۉزلاوچیسی احسانالله کامگار «رادیو پولیس»گه ایتیشیچه، اوشبو اېر-خاتین چقهلاقلرنی ولایت شفاخانهسیدن اۉغیرلهگن.
اونینگ سۉزلریگه کۉره، تخمیناً بیر ییل اوّل اۉغیرلنگن بیر چقهلاق همده اوچ هفته آلدین اۉغیرلنگن ینه بیر چقهلاق اۉز حقیقي آته-آنهلریگه قَیتریلگن.
کامگارنینگ ایتیشیچه، اوشبو ایشده عیبلنهیاتگن عیال (نرس) کییمینی کيیب، بدخشان ولایت شفاخانهسیدن چقهلاقلرنی اۉغیرلب کېلگن.
«رادیو پولیس» بوگون (سهشنبه۶ اسد) اعلان قیلگن خبرگه کۉره، عیال ینه بیر چقهلاقنی اۉغیرلش اوچون شفاخانهگه کېلگنیده اېری بیلن بیرگه انیقلنیب، قۉلگه آلینگن.
بیر یاشلی بالهنینگ آنهسی ضیاگلنینگ ایتیشیچه، اۉتگن ییلی فرزندی توغیلگنیده جراحلیک عملیاتینی باشدن کېچیرگن و اۉرنیدن توره آلمهگن پیتده (نرس) کییمیدهگی بیر عیال چقهلاغینی آلیب چیقیب کېتگن و قَیتیب کېلمهگن.
احسانالله کامگارنینگ ایتیشیچه، بوندن تخمیناً۲۰ کون اوّل هم فیض آباددهگی ولایت شفاخانهسیدن ینه بیر چقهلاق یۉقالگن اېدی.
طالبلر خوفسیزلیک خادملری آلیب بارگن تېکشیروولردن سۉنگ، بدخشان ولایتی مرکزیده یشاوچی اوشبو اېر-خاتین انیقلنیب، حبسگه آلیندی.
طالبلرنینگ بدخشاندهگی امنیه قوماندانلیگینینگ معلوم قیلیشیچه، هر ایکّی چقهلاق و اولرنی اۉغیرلشده عیبلنهیاتگن اېر-خاتین اۉرتهسیده اۉتکزیلگن «دیانای» تحلیللری اولر اۉرتهسیده هېچ قندهی قان-قرینداشلیک موجود اېمسلیگینی کۉرسهتگن.
حاضرده چقهلاقلر اۉز حقیقي آته-آنهلریگه قَیتریلگن.
چقهلاقلرنی اۉغیرلشده عیبلنیب قۉلگه آلینگن اېر-خاتین اېسه بو ایشنی «فرزندلری بۉلمهگنی اوچون» قیلگنلیکلرینی ایتگن.
