بیرلشگن ملتلر تشکیلاتینینگ افغانستاندهگی یاردم ادارهسی (یوناما) سۉنگّی آیلرده طالبلر رسمي اعلان بېرمهگن حالده هم جسماني جزالرنی دوام اېتتیرگنینی، اوچ آی ایچیده۱۳۷ نفر شخص شلاق اوریلگنینی معلوم قیلدی.
یونامانینگ ۲۰۲۶-ییل اپریل، می و جون آیلرینی قمرهب آلگن ینگی گزارشیده ایتیلیشیچه، تشکیلاتنینگ انسان حقوقلری بۉلیمی ۱-اپریلدن۳۰-جونگچه بۉلگن دورده۱۳۷ نفر شخص نینگ، جملهدن۱۱۲ اېرکک و۲۵ عیال نینگ شلاق اوریلگنینی حجتلشتیرگن.
یوناما نینگ بیلدیریشیچه، طالبان۲۲-اپریلدن باشلب جسماني جزالر اجراسی حقیده رسمي اعلان بېریشنی تۉختهتگن و اوّلگیدن فرقلی روشده بو حقده طالبان عالي محکمهسی وېب-سایتی همده اجتماعي ترماقلردهگی صحیفهلریده هېچ قندهی معلومات اعلان قیلینمهگن.
بیراق یوناما انسان حقوقلری بۉلیمی اَیریم ولایتلرده طالبلرنینگ باشلنغیچ محکمهلری و اولسواللیک محکمهلری ۲۲-اپریلدن کېین هم جسماني جزالرنی اجرا اېتگنینی تصدیقلهگن.
بیرلشگن ملتلر تشکیلاتی نمایندهلیگی حساباتیگه کۉره، اَیریم حالتلرده گواهلر جسماني جزا اجراسی وقتیده قتنهشگنلر سانی چېکلنگن بۉلگنینی و اساسن محکمه مسووللریدن عبارت بۉلگنینی بیلدیرگن.
اوّللری طالبلر قمچیلش جزالرینی کۉپینچه سپورت ستدیونلری یاکه محکمه بنالری حویلیسیده عامهوي روشده اجرا اېتیب، بو حقدهگی خبرلرنی عامهوي اخبارات واسطهلریده اعلان قیلردی. اما سۉنگّی آیلرده سیاستینی اۉزگرتیریب، جسماني جزالرنی شاو-شووسیز دوام اېتتیرماقده.
فقط اَیریم چېکلنگن حالتلرده جسماني جزالر عامهوي طرزده اجرا اېتیلگن. مثلاً، ۱۴-جون کونی بلخ ولایتی نینگ دهدادی اولسواللیگیده آلتی اېرکک و بیر عیال قمچیلنگن و بو حقدهگی خبر اعلان قیلینگن.
یونامانینگ معلوم قیلیشیچه، اوشبو آلتی اېرکک رمضان آییده رۉزه توتمهگنلیک عیبلاوی بیلن ایکّی آی قماق و۲۰ درّه قمچیلش جزاسیگه حکم قیلینگن. عیال اېسه نکاحدن تشقری مناسبتده بۉلگنلیک عیبلاوی بیلن بیر ییل قماق و۲۰ درّه قمچیلش جزاسیگه حکم اېتیلگن.
بو شخصلرنینگ جزاسی، قمچیلش حکمی نینگ عامهوي روشده اجرا اېتیلگن سۉنگگی حالتی بۉلیب، طالبلرنینگ محلي مسووللری همده حدود اهالیسی نینگ بیر قِسمی اشتراک اېتگن ییغیلیش دوامیده عملگه آشیریلگن.
