امریکا جمهور رییسی دونالد ترامپ ایران بیلن کېلیشووگه اېریشیش ممکنلیگینی، بیراق ایرانگه بۉلگن ایشانچینی یۉقاتهیاتگنینی ایتدی.
ترامپ بو حقده بوگون (جمعه، ۹ اسد) کمپ دیویدده بۉلیب اۉتگن وزیرلر محکمهسی نینگ 13-ییغیلیشیده ژورنالیستلر اشتراکیده معلوم قیلدی.
امریکا جمهور رییسی شوندهی دېدی: «بیز ایران بیلن کېلیشووگه اېریشیشیمیز ممکن. اما مېن اولرگه بۉلگن ایشانچیمنی یۉقاتیهپمن، چونکه اولر یالغان گپیریشهدی.»
ژورنالیستنینگ «حکومتدن ایران بیلن کیم مذاکره آلیب بارماقده؟» دېگن سوالیگه ترامپ: «استیو، جرد، جی دی، مارکو.»دېب جواب بېردی.
ژورنالیست: «اما اولر مذاکرهلر بۉلهیاتگنینی انکار اېتیشیپتی»، دېگنیده، ترامپ: «اولر فقط مېنی جهلیمنی چیقریپتی»، دېدی.
امریکا جمهور رییسی بیر وقت نینگ اۉزیده ایرانگه قرشی حربي تهدید هم بیلدیریب، شوندهی دېدی: «بیز اولرنی جوده قتّيق اورهمیز. شوندهی درجهده اورهمیزکی، اولر: «بیز اېندی بونگه چیدهی آلمهیمیز»، دېیدیلر.»
او ینه: «بیز فقط غلبه قازانیشنی ایستهیمیز. ایشلریمیز جوده یخشی کېتماقده»، دېیه قۉشیمچه قیلدی.
دونالد ترامپ امریکا هجوملری نتیجهسیده ایران نینگ حربي صلاحیتی سېزیلرلی درجهده ضعیفلشگنینی تأکیدلب، اولر «برباد بۉلهیاتگنینی» و «یقین آرهده اولردن دېیرلی هېچ نرسه قالمسلیگینی» ایتدی.
ترامپ هفته باشیده امریکا و ایران اۉرتهسیده «دۉستانه مذاکرهلر» دوام اېتهیاتگنینی بیلدیرگن اېدی. بیراق اونینگ بو بیاناتیدن ۲۴ ساعت هم اۉتمهی، ایکّی تامان اۉرتهسیدهگی اۉزارا هجوملر ینه باشلندی.
هر ایکّی دولت بیر-بیرینی «اسلام آباد کېلیشووی»نی بوزیش و مذاکرهلرده آلینگن مجبوريتلرگه عمل قیلمسلیکده عیبلهماقده.
امریکا و ایران اۉرتهسیدهگی مذاکرهلر اساسن پاکستان، عمان و قطر واسطهچیلیگیده آلیب باریلماقده.
