تانیقلی نشرلردن بۉلمیش «دیپلومات» نشری بوگون اېرتهلب بیر تحلیلی گزارش ترقهتیب، مملکتلر تامانیدن افغانستانلیک مهاجرلر بو مملکتگه قیتریلیشی سیاستی عاقبتلری حقیده فکر بیلدیرگن.
اوشبو تحلیلی گزارشده، قید اېتیلیشی میلادی ۲۰۲۱ – ییلدن سونگ، مملکتلر افغانستانده جانلری تهدید آستیده بۉلگن شخصلرنی بو مملکتدن چیقریب، اولرنی قۉللب-قۉتلشگه حرکت قیلگن بۉلسهده بیراق حاضر بو سیاست اوزگریب، مملکتلر مهاجرلرنی قیتریش سیاستیگه اۉتگنلر.
اوشبو سیاست اساسیده، میلادی ۲۰۲۳ – ییلدن بویان آلتی میلیوندن آرتیق مهاجر، ایران و پاکستاندن چیقریلیب افغانستانگه قیتریلگنی و یقینده اروپا مملکتلری افغانستانلیک مهاجرلرنی قیتریش اوچون حرکتلرنی باشلهگنی بیلدیریلگن.
دیپلومات نشری بو گزارشیده، خلقارا تورلی خیل مهاجرت مرکزی یا ده (MMC) معلوماتلریگه اساسلنیب ایتیشیچه، افغانستانلیک مهاجرلردن ۸۰ فایزگه یقینی، مملکتلر تامانیدن تیکشیریلگن یا ده دیپورت قیلینگن بو اېسه اوشبو مهاجرلرنینگ کۉپینچهسی مجبوری حالده افغانستانگه قیتریلگنینی بیللی قیلهدی.
شو بیلن بیرگه، دیپلومات نشری افغانستان حاضر گواهی بۉلیب تورگن برقرارسیزلیکلر و انسانپرورلیک معمالریدن اېسلب، شوندهی بیر شرایطده مهاجرلر افغانستانگه قیتیشی آغیر عاقبتلرگه آلیب کېلیشی ممکنلیگیدن هم آگاهلنتیرگن.
نشرنینگ یازیشیچه، بو وضعیتدن کۉپراق عیاللر، قومی و دینی آزچیلیکلر و حاضرگی حاکمیت بیلن قرشیلیکده بۉلگنی ایتیلگن شخصلر ضررلنهدیلر.
شونینگدېک، بو گزارشده، افغانستانگه قیتریلگن مهاجرلر آغیر ایشسیزلیک، باشپناهسیز و شونگه اوخشش باشقه جدّی معمالرگه دوچ کېلیشی هم اېسلهتیلیب، (MMC) معلوماتی اساسیده، افغانستانگه قیتریلگن مهاجرلردن چمهسی ۴۰ فایزی ساغلیقنی سقلش خذمتلریگه قۉل تاپمسلیکلری معلوم قیلینگن.
بونگه قوشیمچه، دیپلومات نشری گزارشیده، خلقارا تورلی خیل مهاجرت مرکزی معلوماتلریگه اساسلنیب ایتیلیشیچه، افغانستانگه قیتریلگن مهاجرلر جملهسیدن یالغیز ۷ فایز عیاللر و ۵۹ فایز ایرککلر اۉزلریگه قیته درآمد منبعسینی تیکلشده موفق بۉلگن و قالگنلریگه دېیرلی ایش شرایطی موجود بۉلمهگن.
گزارشده، بو وضعیتدن عیاللر اینیقسه قومی و دینی آزچیلیکلرگه تېگیشلی بۉلگن عیاللر اساسی ضررلرنی کۉریشی معلوم قیلینیب، اولر بیر نیچه برابر باسیملرگه دوچ کېلهیاتگنی معلوم قیلینگن.
قیزلر یوزیگه مکتبلر یاپیق قالیشی، عیاللر ایشلشی برابریده قۉییلگن تقیق و چیکلاولر، شونینگدېک اولر محرمسیز سفر قیلالمسلیگی و جماعهده اشتراکی برابریدهگی چیکلاولر عیاللر قرشیسیده بۉلگن اساسی معمالردن اېکنی قید اېتیلگن.
دیپلومات نشری گزارشیده، افغانستانگه قیتریلگن مهاجرلردن یریمیدن آرتیغی بۉلمیش ۵۳ فایزی هیچ قندهی انسانپرورلیک یاردملرگه ایریشمهگن و بو رقم عیاللر آرهسیده ۶۵ فایز دیر.
دیپلومات نشری اۉز حساباتیده، افغانستانگه مهاجرلر قیتریلیشی جریانیده اولر برقرار حیاتگه ایریشیشی و خوفسیزلیگیگه اعتبار قرهتیلیشی همده بو خصوصده اروپا مملکتلریدن دیموکراتیک و انسانپرورلیک ارزشلرینی هم نظرده توتیشی طللب قیلینگن.
بو شوندهی بیرحالده دیر که اخیرگی وقتلرده، افغانستانلیک مهاجرلرنی مملکتلر تامانیدن چیقریلیشی جدّیلشیب، کېنگ خواطرلرنی اۉرتهگه آلیب کېلگن.
