امریکاده افغانستان مسالهسیگه عاید اۉتکزیلیشی رېجهلشتیریلگن ییغینده، اۉزبېک سیاستچیلردن و افغانستان سابق پارلمانینینگ اعضالریدن بۉلمیش سنجر کارگر و بابر جمال جنابلری هم، چقیریلگن.
ایشانچلی منبعلر اوشبو ییغینده بو ایکّی اۉزبېک سیما چقیریلگنینی هم اۉزبېک تیوی گه تصدیقلهدی. دېیرلی بوندن آلدین منبعلر، اوشبو ییغینده دوستم جمغرمهسی باشلیغی و سابق حکومت سنا کېنگشینینگ کاتبی راحله دوستم چقیریلگنینی هم تصدیقلهگن اېدی.
حاضرگچه، سنجر کارگر همده بابر جمال جنابلرینینگ بو ییغینده اشتراک اېتیشی یا اېتمسلیگی بیللی اېمس.
ییغین قیسی تشکیلات تامانیدن اۉتکزیلهدی؟
اۉزبېک تیوی اختیاریده قرار تاپگن معلوماتگه کۉره، اوشبو ییغیندن طالبانگه قرشی حربی جبههلردن بۉلمیش «افغانستان متحد جبههسی» مېزبانلیک قیلهدی.
معلوماتلر اساسیده سابق حکومت حربیلریدن بۉلمیش سمیع سادات یېتکچیلیگیده فعالیتگه باشلهگن بو جبهه، امریکاده اۉتکزیلیشی رېجهلشتیریلگن بو ییغین اشتراکچیلریگه چقیریق کارت یۉبارگن.
افغانستان متحد جبههسی یقینده حربی فعالیتلرینی باشلب، طالبانگه قرشی بیر قنچه هجوملرنی اویوشتیرگنینی هم ادعا قیلگن.
ییغین قچان و نیمه موضوعلر خصوصیده اۉتکزیلیشی رېجهلشتیریلگن؟
اۉزبېک تیوی معلوماتی اساسیده، اوشبو ییغین «افغانلر دوزخی و ترورچیلر باشپناهسی؛ افغانستان شانینی قیترهمیز» عنوانی آستیده، طالبان حاکمیتگه قیتگنی کونی بۉلمیش ۲۴ – اسد یا ده ۱۵ -اگست کونی اۉتکزیلهدی.
دېیرلی ییغینده، متخصصلر، سیاستچیلر و ایش بیلرمانلر چقیریلگنی معلوم قیلینگن.
شونینگدېک، اوشبو ییغینده افغانستان مسالهسیگه عاید استراتیژیک موضوعلر، انسان حقلری احوالی و ترورچیلیک تهدیدلری خصوصیده بحث اېتیلیشی رېجهلشتیریلگن.
بو شوندهی بیرحالده دیر که طالباننینگ افغانستان حاکمیتینی ایگهلگنیگه بېش ییل بۉلیشی بیلن بیر وقتده، بو گروهگه قرشی حربی فعالیتلر هم کوچهیگن.
